Россияны асгер къуллугъунда оьзюн лап яхшы яндан гёрсетгени саялы, Бабаюрт районлу солдат Расул Зубакъов Нагорный Карабахда ерлешген россиялы парахатлыкъны болдурув асгер гючлерини генерал-полковниги Александр Ленцовну буйругъуна гёре «Нагорный Кара-багъда парахатлыкъны якълавда ортакъчылыкъ этгени учун» деген гезикли медальгъа ес болгъан.
Биз алда да эсгергеник йимик, парахатлыкъны болдурагъан асгер бёлюкде борчун кютеген Р. Зубакъов Абхазия Республикасындагъы агьва-латларда да ортакъчылыкъ этген ва республиканы пачалыкъ савгъатына ес болгъан. Украина булангъы хас дав гьаракат башлангъанда буса, Расул Зубакъов дав ёлдашлары булан Донбасны халкъын украинли миллетчилерден намуслу кюйде якълагъан. Алдынлылардан болуп ери гелгенде дав ёлдашларына авур яра тийгенлеге кёмек этген. Онда гёрсетген игитлиги ва къоччакълыгъы учун ол Россияны Президенти В. Путинни Указына гёре Жуковну медалы булан да савгъатлангъан.
Дав командировкасы битген сонг Расул гьали де къуллукъ этеген Нагорный Карабагъдагъы халкъны парахатлыгъын якълайгъан асгер бёлюгюне бакъдырылгъан.
Бу йылны май айыны ахырынчы гюнлеринде, Оборона министри, Сергей Шойгуну буйругъуна гёре, Расул Зубакъов «Парахатлыкъны якълав операциясыны ортакъчысы» деген медаль ва Россия Федерацияны савутлу гючлерини машин гьайдавчусуну байрам гюнюню 113 йыллыгъына байлавлу болуп Гьюрметлев грамота булан да савгъатлангъан.
