Гьалиги заманда пачалыкъны ва халкъны сурсат аманлыгъын болдурув 21-нчи асрубузну аслу савуту болуп токътагъан.
Россияны аграр республикасы гьисапда танывлу Дагъыстанда сурсат аманлыкъ учун юрюлеген гьаракатны натижалары уьлкебизни оьзге регионлары булан тенглешдиргенде, хыйлы артыкъ демеге ярай. Американы Бирлешген Штатлары ва шолай да Евросоюзну бизин уьлкебизге къаршы юрютеген санкцияларына бойсынмай оьсюмлюкчюлюкню ва гьайванчы-лыкъны мердешли тармакъларында болдурулагъан юрт хозяйство малланы санаву ва сан яны Дагъыстанда айрыча къолайлашагъаны ачыкъ болуп гёрюне. Бизин республикабызда йылда 700 миллиард манатны оьлчевюнде гьар тюрлю сурсат маллар — авлакъ ниъматлар, эт, сют болдурулагъаны да шону ачыкъдан ташдыра. Дагъыстанлылар гьалиги заманда янгыз оьз къоллавчуларыны ич талаплары учун ишлеп къоймайлы тышдагъы талапланы да гьисапгъа алып сыйлы борчларына намуслу кюйде янашагъаны гележек учун да инамлыкъны тувдура.
– Украина бойда юрюлеген хас асгер гьаракатны ортакъчыларына ва шолай да Россияны янгы регионларында яшайгъан къоллавчулагъа сурсат булан инсаплы кёмек этивде Дагъыстан биринчи ерде экени гьакъда айрыча эсгермеге герек – деди Россияны Президенти Владимир Путин ДР-ни Башчысы Сергей Меликов булан болгъан ишчи ёлугъувуну вакътисинде. – Дагъыстанлылар янгы регионлагъа этеген сурсат кёмеги булан дазуланмай, гележекни гёз алгъа тутуп бавчулукъ, юзюмчюлюк ва овощлар оьсдюрювде топлагъан бай сынавун асувлу кюйде пайдаландырагъаны да инсаплы сипте.
Гертиден де, етишилген натижалары булан дазуланмайлы бизин республикабызны юрт хозяйство къуллукъчулары илмуда ва сынавда бар имканлыкълардан, алдынлы асувлу къайдалардан бажарывлу кюйде пайдаланмагъа къасткъыла. Юрт хозяйство ишлени машинлешдиривде, сугъарывну масъаласын ёрукълашдырывда, топуракъланы кюйлевючлер булан таъмин этивде, зараллы жанлагъа ва аврувлагъа къаршы оьтгерилеген чаралар хайыргъа токътай. Шо да гележекде юрт хозяйство агьамияты булангъы топуракъ байлыкъларыбызны асувлу кюйде къолланагъан майданларын дагъы да артыкъ этип генглешдирмеге, чачывлукъланы толумлашдырмагъа имканлыкълар ярата.
Не часанг, шону аларсан деген агьамиятлы буварыв да тергевсюз къалмай. Айтмагъа сюегенибиз, оьсюмлюкчюлюк ва гьайванчылыкъ тармакъларда сайламлы урлукъланы болдурув, жынслашдырыв ишлени камиллешдирив сурсат аманлыкъ учун юрюлеген гьаракатда къайтарышын берегени гьакъда айрыча эсгермеге герек.
Шолайлыкъда, базар аралыкълар оьмюр сюреген девюрде оьсдюрюлеген юрт хозяйство продукцияны оьзюне токътайгъан багьалары ёрукълаш-дырыла. Артдагъы йылларда айлана якъдагъы базарларда ва тюкенлерде сатылагъан юрт хозяйство малланы багьаларын гьатдан озма къоймас учун тармакъ министерликлени янындан пачалыкъ программаланы оьлчевюнде логистика центрланы къурувгъа ва пайдаландырывгъа тергев арта бара.
– Бизин республикабызны гьар тюрлю бойларында 90 минг тонгъа ювукъ юрт хозяйство продукцияны сакълавгъа салмагъа имканлыкълар болдурулгъан. Гележекде шону санавун 150 минг тонгъа етишдирмек учун гьаракат этиле, – дей ДР-ни юрт хозяйство ва сурсат министрини заместители Эмин Шейхгьасанов. – Республикабыздагъы юрт хозяйство продукцияны ишлетеген предприятилени янгыртывгъа ва къурувгъа да тергев арта. Къызлар, Къызылюрт, Гергебил, Лаваша, Шамил, Дербент, Сулейман-Стальский, Хасавюрт районларда консерво заводлар юрт хозяйство къуллукъчуланы талапларына къол ялгъай. Юрт хозяйствода авур буса да, тек абурлу ишге белсенгенлер учун онгайлыкъланы яратыв – шо да пачалыкъ оьлчевде чечмеге тюшеген масъала.
