Дагъыстанда, аслу гьалда Каспийск ва Магьачкъала шагьарланы арасындыгъы бойларда ерлешген керпич чыгъарагъан заводларда, артдагъы йыллар тышдан гелген адамланы гючден ишлете деген хабарны хыйлыбыз эшитгенбиз.
Гьар тюрлю себеплеге гёре, гёнгюлсюз кюйде загьмат къуллагъа айлангъанланы къайсын буса да бирисин азат этме бажарылгъанда яда олар оьзлер къачып къутулса, шо гюнокъ маълумат бютюн уьлкеге яйылып чыгъа эди. Жамаатны арасында танкъытлы, къарсалавлу сесленивлени тувдура эди. Аманлыкъны къоруйгъан къурумлар да оьз янындан бир тюрлю чаралар гёрген сонг, шо терс мердеш гьали сама токъталар деген умут бар эди. Амма шону булан байлавлу болгъан артдагъы агьвалат загьмат къулчулукъ бугюн де узатылып тура деген ойгъа гелесен.
Белоруссияны ватандашы Станислав Жуков Москвадагъы вокзалланы бирисинде эки жагьил дагъыстанлы адам булан таныш болгъан. Олар Станиславгъа оьзлени Магьачкъаланы къырыйындагъы тизив шартлары ва бары да онгайлыкълары булангъы фермада тракторист болуп ишлемеге таклиф этген, гьар айда 40 минг манат алапа да тёлежекбиз деп сёз берген. Шо вакътилерде четим, чарасыз гьалгъа тарыгъан С.Жуков разилигин бере ва узакъ къалмай олар булан бирче поездге де минип Дагъыстангъа, Каспийскиге етише.
Тек ерине гелгенде жагьил адамлар оьзюн алдатгъанын шоссагьат англай ва керпич заводда ишлеме тюшежегин билген. Ону документлерин, кисе телефонун чыгъарып алгъан. Къачма къарасанг, оьлтюрежекбиз деп де къоркъувлар этген. Заводну есиси Станиславгъа ва ону йимик гече де, гюн де ял алывсуз ишлейген дагъы да бир нече талайсызгъа этген иши саялы бир кепек акъча да тёлемей, къулчулукъгъа дёнгенлер ярты-юрту биширилген ашдан ва сувдан къайры дагъы затны гёрмеген. Ятагъан ерлери де бек онгсуз гьалда болгъан.
Муна шо заман С.Жуков не этип буса да къачма, зулмучуларындан къутулма токъташгъан. Геч ортада къаравулчуланы юхлайгъанындан пайдаланып, ёлгъа чыгъып, Магьачкъалагъа багъып юрюген, тек огъар тахшагьаргъа ерли етишмеге насип болмагъан. Ёлда, къарангы гечеде, ону оьтюп барагъан машин уруп йыкъгъан ва Станислав авур яраланып азарханагъа тюшген. Врачлагъа яралангъан адамны яшавун сакъламакъ учун, ону бир аягъын гесип тайдырмагъа тюшген. Азарханагъа полицейскийлер де гелген ва ахтарывланы башлагъан. Арадан бир ай оьтюп, Станислав Жуков уьюне, Белоруссиягъа къайтгъан. Керпич заводну есиси буса, Россияны Уголовный кодексини 127-нчи статьясына гёре жаваплыкъгъа тартылажакъ ва 5 йылгъа ерли азатлыкъдан магьрюм этилинме бола.
Бир-бир федерал маълумат къураллар билдиреген кюйде, бизин республиканы загьмат къулчулукъну отавуна, тахшагьарына гьисап этип гёрсетегени де жинаятчылыкъны шо тайпасы бизге ювукъ Ставропол ва Краснодар крайларда да эркин кюйде яйылгъан. Онда загьмат къулланы юрт хозяйство тармакъда эркин кюйде къоллайлар. Гетген йыл Россияны судларында загьмат къулчулукъгъа байлавлу 119 уголовный ишге къаралгъан. Шо буса 2022-нчи йыл булан тенглешдиргенде 4,3 процентге артыкъ.
Алав Алиев.
