Гетген йыл бабаюртлу Элдар ГЬАЖИМУРАТОВ Санкт-Петербургдагъы милли гвардияны военный институтуна тюшген деген хабар дос-къардашны чы нечик де, бары да юртлуларын да сююндюрдю. Неге тюгюл де, эсгерилген институтгъа тюшмек учун билимден къайры да, яхшы савлукъ ва спорт булан машгъул болуп турма гереклиги ачыкъ. Элдар, шолай, яхшы охувундан къайры, спорт булан ёлдашлыкъ тутгъан: ол юртунда спортну тюрлю-тюрлю журалары булан машгъул болуп тургъан.
Элдарны ата-анасы Марат ва Надия уланы сайлагъан касбугъа къаршы турмагъан. Охув йыл башлангъаны кёп де болмай. Элдар шо заманны ичинде гиччирек буса да уьстюнлюклеге етишген ва командиринден макътавлар къазангъан.
Бираз алда Гьажимуратовланы агьлюсюне институтну начальниги генерал-майор В. П. Бышовецни атындан «Баракалла кагъыз» гелген. Шо кагъызда шулай сёзлер бар:
«Гьюрметли Марат Жабрайылович ва Надия Нугьбековна!
Сизге уланыгъыз Гьажимуратов Элдар Маратовични герекли кюйде тарбиялагъаныгъыз учун гьакъ юрекден баракалла билдирме сюемен. Сизин уланыгъыз оьзюню борчларын, алдына салынгъан тапшурувланы ва масъалаланы да уьлгюлю кюйде кюте. Элдар Маратович аз заманны ичинде тенглилерини арасында абур къазанма болду, низам якъдан да ёлдашларына уьлгю болуп тура.
Элдар Маратовичге ишлеп болагъанлыкъ, тюз гьасил чыгъармакъ, яхшылыкъ ёрав ва чыдамлыкъ – хас хасият. Сизге гьакъ юрекден ишигизде уьстюнлюк, яхшы савлукъ, насип ёрайман!
Санкт-Петербургдагъы милли гвардияны военный институтуну начальниги генерал-майор В.П.БЫШОВЕЦ».
Бизин якълылар асгер борчун кютегенде оьзлени сав-саламат тутуп, тапшурулгъан ишлени намуслу кютегени сююндюре. Янгыз бир адам да Дагъыстанда яшайгъанланы гьакъында яхшы ойлашсын деп кёп зат этме бола. Элдар Гьажимуратовну Ватанын сакъламакъ учун тутгъан ёлу да асгерлик касбуну сайлама сюегенлеге уьлгю болуп токътай. Шолар бары да буса башлап оьзюню къастлыгъындан ва агьлюде тарбиялав яхшы болгъанлыкъдан гьасил бола. Гележекде де Элдар Ватанны алдында борчун намуслу кюйде кютежекге шеклик этмейбиз ва огъар тутгъан ёлунда уьстюнлюклер ёрайбыз!
Гебек КЪОНАКЪБИЕВ.
