Бизин жамиятыбызда гьалиги заманда ишсизликни натижасында гьар тюрлю жинаятчылыкъ ишлеге ёл берилегени булан разилешмеге тюшмей. Муна шо саялы да яй вакътилерде охувундан бош заманында яшланы спортгъа, ял алыв ва савлукъ сакълав чаралар булан янаша загьматгъа къуршав – агьамиятлы масъала. Чубугъунда иелмеген къазыгъында сынмас деп негьакъ айтылмай.
Шону гьисапгъа алып, гьали-гьалилерде ДР-ни загьмат ва яшавлукъ масъалалагъа къарайгъан министерлиги булан байлавлукъда Магьачкъалада шагьар администрация каникуллагъа чыкъгъан айларда 14-18 йыллыкъ чагъындагъы охувчуланы заманлыкъгъа ишге къуршамакъ учун иш ерлер малим этген.
Иш ерлени малим этивде тахшагьарыбызны далапчы тайпалары, шолай да «Тендер» ва оьзге компаниялар ортакъчылыгъын болдургъан. Шолайлыкъда, оьтгерилеген чараланы ортакъчылары 100-ден де кёп охувчу яшланы иш ерлери булан ювукъдан таныш этген.
Натижада иш бермеге разилешгенлени арасындан еттиси 70 охувчу яшны каникулланы вакътисинде иш ерлер булан таъмин этме разилигин билдирген ва тийишли кагъызларын тапшургъан.
Къ. КЪАРАЕВ.
СУРАТДА: гьакъылбалыкъ болмагъан охувчу яшлар иш ерлер булан таныш болагъан вакъти.
