Аявлу яшлар, бугюнлерде сизин учун бирдагъы бир охув йыл тамамлана. Яйлыкъ каникуллардан сонг, башлапгъы ва оьр класларда билим алагъанларыгъыз охувну узатажакъсыз. Оьр класланы, демек, 9 -нчу ва 11-нчи класланы тамамлап чыкъгъан уланланы ва къызланы буса гьали де ял алмагъа чоласы ёкъ. Бираздан олар учун лап къыставуллу гюнлер: аслу ва бирикген пачалыкъ экзаменлер башланажакъ.
Сизге барыгъызгъа да шо экзаменлени барышында оьтгерилеген сынавлардан уьстюнлю кюйде оьтмекни ёрайбыз. Шону булан бирге, сиз юрекге тутгъан касбулагъа ес болмакъ учун оьр ва хас билим береген охув ожакълагъа тюшмеге насип болсун деп айтмагъа сюебиз. Сизин булан бирче мактапда охувун узатажакъ инилеригизге ва къызардашларыгъызгъа яхшы савлукъ, кёп яхшылыкълар да ёрайбыз. Умутларыгъызны арты бир де уьзюлмесин!
