Алдагъы гюн Дагъыстан Республиканы Гьукуматыны Председа-телини заместители Абдурагьман Магьмутов ва ДР-ни савлукъ сакълав министри Татьяна Беляева Къарабудагъгент районну администрация-сында къызамукъ аврувгъа байлавлу шондагъы гьалгъа, эпидемиягъа къаршы ишлени оьтгеривюне гёре жыйын болгъан.
Шо жыйында Къарабудагъгент районну башчысы Магьмут Амиралиев, Роспотребнадзорну Каспийскге ва Къарабудагъгент районгъа къарайгъан бёлюкню начальниги Омар Абачараев, администрацияны, медицина идараланы, район больницаны ва муниципал охув ожакъланы ёлбашчылары ортакъчылыкъ этгенлер.
Жыйындагъылар пикруларын айта туруп, райондагъы эпидемиология гьал ёрукъгъа тюшюп битмегенни эсгергенлер. Ондан къайры, авругъанланы арасында биревге де къызамукъдан прививка этилмегени ачыкъ болгъан. Чагъына гёре алгъанда, яшланы арасында авругъанлар 84 процентге етише. Бу югъагъан аврув школа чагъына етишмеген яшлар юрюйген 9 ва 11 билим берив ожакъларда яйылгъан деп гьисапгъа алынгъан.
Къызамукъдан авруйгъанлар яшайгъан ерлерде эпидемиягъа къаршы чаралар оьтгерилегенден къайры, аврувлар булан къатнагъанлагъа да прививка этиле. Сонг да, Дагъыстанда апрель айдан тутуп къызамукъну енгеген, иммунитетин беклешдиреген вакцина этилинип тура.
Шо жыйында сёйлегенлер яшланы иммунитетин къоруйгъан вакцина къызамукъну яйылывуну алдын алмагъа бола, масъаланы чечмеге де кёмек эте деген гьасилге гелгенлер. Олар адамлар кюрчюсюз кюйде вакцинаны гери урагъангъа югъагъан аврув гетген йылдан эсе гьали бек яйылгъанны эгергенлер.
Жыйынны натижаларына гёре, Къарабудагъгент район больницаны ва охув ожакъланы ёлбашчыларына тувулунгъан гьалгъа гёре тийишли ишлени юрютмекни тапшургъанлар. Олай да, Къарабудагъгент районну ёлбашчысы Магьмут Амиралиев бу масъаланы оьзюню тергевюне алып, халкъны арасында яшланы савлугъун сакълавну кёп агьамияты бар экенге байлавлу англатыв маълумат ишлени гючлендирмеге герек деп белгилеген.
