Россияны Президенти Владимир Путинни указларында савлукъ сакълавгъа, билим берив ишлени камиллешдиривге айрыча тергев берилегени негьакъ тюгюл. Савлукъ блмаса, дюньяны бир байлыгъы да гёзюнге гёрюнмей, билим буса – битмейген хазна.
Айтмагъа сюегеним, билимли ва англавлу ватандашлары булангъы пачалыкъда савлукъ булан аманлыкъны масъалаларын ёрукълаш-дырмагъа бажарыла.

Муна шо саялы да, уллу уьлкебизни оьзге регионларында йимик, артдагъы йылларда Дагъыстанда да оьсюп гелеген наслубузну билимлерин къолайлашдырмагъа ва тарбиясын тийишли даражагъа гётермеге имканлыкъланы яратыв гьалиги заманны аслу масъа-лаларыны бириси болуп токътагъан. Шолайлыкъда, республикабызны районларында ва шагьарларында янгы ясли бавлары, школалар къурула ва пайдаландырывгъа бериле.
Пачалыкъ агьамияты булангъы объектлени болжалларын йырмайлы къурулуш ишлени сан яны булан оьтгеривге аслу тергев бакъдырыла. Шогъар ДР-ни Гьукматыны янындан оьтгерилеген тергевлер де шагьатлыкъ эте.

Магьачкъаланы темиркъазыкъ боюнда гьалиден 30 йылгъа ювукъ алда Темиркъазыкъ Кавказда лап да уллу посёлок гьисапда Семендерге кюрчю салынгъан эди. Арадан оьтген вакътини ичинде эсгерилген яшавлукъ отавда орунлашгъанланы умуми санаву 20 мингден айланып тура.

Янгы охув йылгъа – янгы школа

Посёлок йыл сайын оьсе ва генглеше. Оьсювню гёз алгъа тутуп, гьаракат юрюлеген ерлерде уьстюнлюклер булан янаша, кемчиликлеге де ёл берилегени ­англашыла. Айтмагъа сюегеним, кёп адамлар турагъан ерде олар учун онгайлы яшавлукъ къуллукъланы болдурувну масъаласы да теренден ойлашып чечмеге ва тийишли чараланы гёрмеге борчлу эте. Гьалиге ерли посёлокдагъы ясли бав ва школа чагъындагъы яшларын ата-аналары харж этип дегенлей, шагьардагъы башгъа-башгъа ясли бавлагъа ва школалагъа бармагъа ёл чыгъагъаны къыставуллукъну тувдура.
Гьалиги заманда уллуланы ва яшланы талапларын гьисапгъа алып, посёлокда айлана якъда оьтгерилеген чаралар юрекни рази къалдырамы деген сорав тувулуна.

Оьсюп гелеген наслуларыбызны тарбиялавну ва билимлерин камиллешдиривню гьакъында айтсакъ, озокъда, сёзден ишге гёчмеге заман болгъан. Шону учун, агьлюде йимик, яшлар тарбияланагъан ясли бавланы, билим алагъан школаланы ва оьзге тюрлю ожакъларда муниципал къурулувларына сыйлы борчгъа йимик янашывну камиллешдирив агьамиятлы.

– Семендерде 1224 охувчу яшгъа ери булангъы гьалиги талаплагъа толу кюйде жавап береген уллу школаны къурулушу тамамлана, – деди гьали-гьалилерде оьтгерилген прес-конференциясында ДР-ни къурулуш, ЖКХ ва архитектура министри Артур Сулейманов. – Шону бу йыл 1-нчи сентябрде пайдаландырывгъа бермек учун гьазирлик чаралар оьтгерилип тура. Сыйлы борч оьз болжалында яшавгъа чыгъарылажагъына шеклик ёкъ демеге ярай.

Этсе болур давалар

Артдагъы йылларда «Онгайлы шагьар шартлар учун», «Асил ёллар − аманлыкъны ёллары», «100 школа» деген милли проектлени оьлчевюнде Семендерде болгъан тюрленивлер, гертиден де, гёзге илине.

Бугюнлерде Дагъыстанны Гьукуматыны Председатели Абдулмуслим Абдулмуслимов да эсгерилген охув ожакъны гьазирлигин аян этмек учун ишлени барышы ва сан яны булан ювукъдан таныш болду. Гертиден де, Семендерде къурулгъан бу янгы охув йылда пайдаландырывгъа берилежек школа билим берив ва тарбиялав ишлени юрютмеге толу кюйде имканлыкъ бережеги шекликни тувдурмай.

Янгы школада шону учун 4 корпусда гьарисинде башгъа-башгъа онгайлы шартлар яратылынгъан. Дагъы да ачыкъ этип айтгъанда, 800 адам сыягъан жыйынлар оьтгерилеген зал, оьрдеги ва башлапгъы класларда охуйгъан яшлар учун 25 ва 12 метр узунлугъу булангъы эки бассейн, 408 яшгъа ашамагъа ери булангъы ашхана, билим беривню алдынлы техника къайдаларын къолламакъ учун ва яшланы савлугъуна кёмек болдурагъан хас кабинетлер тийишли къураллар булан ясандырылгъан. Шолай имкан-лыкълар, билим алыв булан дазуланмайлы, гьар тюрлю шатлыкъ чараланы да оьтгермеге пайдаландырмагъа ёллар ачагъаны гьакъ.

Юз керен эшитгенден эсе, бир керен гёрген къолай. Бизге де янгы охув йылда шолай онгайлыкълагъа семендерли ата-аналар ва оланы яшлары, муаллимлер шагьат болажагъына инанмакъ къала.

Айланасы − бахча-бав

Янгыртып къурувну йылларында оьсюп гелеген яш наслубузну загьматда тарбиялавну, ял алывуну масъалалары да теренден ойлашдыра. Янгы школаны айланасында 23 минг квадрат метр ерде ял алагъан ерлер гьазирленген, тереклени гьар тюрлю журалары орнатылгъан.
Орнатгъан булан иш битмей. Бир ва кёп йыллыкъ оьсюмлюклени аман кюйде оьсдюрмек учун тийишли къуллукъларын кютмесек бажарылмай. Билим берив булан дазуланмайлы, яшланы загьмат дарсларын асувлу кюйде пайдаландырывгъа да тергев герек бола. Загьмат дарслар оьсюмлюклеге къуллукъ этивню сырларына тюшюндюрегени гьакъ. Янгы школаны абзарында ва айланасында безендирив ишлени оьтгеривге байлавлу сиптечилик башлангъаны да ачыкъдан гёрюнюп тура.

Пачалыкъ программаны оьлчевюнде

Семендердеги янгы школа «Билим беривню оьсдюрюв» деген пачалыкъ программаны оьлчевюнде къурулгъаны гьакъда да айрыча эсгермеге тюше. Шону учун харжлар РФ-ни билим берив министерлигини ва шолай да Дагъыстанны Гьукуматыны арасында болгъан разилешивге гёре федерал ва регион бюджетлерден айырылгъан болгъан.

Янгы школаны тургъузуп, пайдаландырывгъа бермек учун 1 миллиард 12 миллион манат акъча маялар харж этилинген.
Семендердеги ва Красноармейск посёлокдагъы яшлар, ата-аналар, учителлер учун янгы охув йылда уллу школа кёп йылланы узагъында къаравуллангъан ла­йыкълы савгъат гьисапда шатлыкъ­ны шартларында ачылажагъын ата-аналар ва яшлар рагьатсыз къаравуллай.