Яшёрюмлени билим, касбу якъдан оьсювю, бажарывлугъун артдырмакъ учун гьар тюрлю чаралар оьтгериле. Эсгерилген чараланы кёбюсюн яшёрюмлени ишлерине къарайгъан федерал агентлиги оьтгере.
«Росмолодёжну» грантларыны гьакъында кёп санавда яшёрюмлер эшитмей, билмей къутгъарып къоя. Шо саялы да алданокъ маълуматлар берип яшёрюмлеге билдирмекни пайдасы бар. Неге тюгюл, форумларда ортакъчылыкъ этив яшёрюм-леге кёп уллу имканлыкълар ярата.
Эсгерилген агентлиги оьтгереген чараланы арасында гьар йыл Дагъыстанда юрюлеген «Каспий» деген форум да бар. Бу йыл эсгерилген форум сентябр айны 22-ден 27-не ерли оьтгерилежек. Онда ортакъчылыкъ этмек учун бугюнлерде гьисапгъа алыв башлангъан. Олар алданокъ гьазир болмагъа ва заманында арза бермеге герек.
Дагъыстан Республиканы яшёрюмлерини министрелигини прес-къуллугъу билдирген кюйде, бу йыл билим берив «Каспий» форум 5 тюрлю агъымларда оьтгерилежек: далапчылыкъ, туризм, интернет-медиа, патриот ругьда тарбиялав ва «Биринчилени гьаракаты» учун айры агъым.
Гьар йыл йимик, бу йыл да форумну ортакъчыларына лекциялар, «мастер-класлар» ва башгъа чаралар оьтгерилежек ва гьасиллерине гёре грантлар берилежек.
Яшёрюмлер оьзлер машгъул агъымны айырып ортакъчылыкъ этмеге бола. Аслусу – грант алып, оьзлени проектлерин яшавгъа чыгъармагъа имканлыкъ бериле. Гетген йыл оьтгерилген форумларда Дагъыстандан 81 яшёрюм грант алгъан. Олар гьар тюрлю форумларда гьаракатчы кюйде ортакъчылыкъ эте ва санавун артдыра. «Росмолодежь» агентлиги оьтгереген чараларда грантлар шонда ортакъчылыкъ этип утгъан яшёрюмлеге оьзлеге бериле. Демек, яшёрюмлер гьар тюрлю проектлени яшавгъа чыгъармагъа бола. Оланы арасында экология, рагьмулу ишлер этив, патриот ругьда тарбиялав, гьайванланы къорув ва башгъалары бар. Дагъыстанда оьтгерилеген «Каспий» деген форумда да гьар йыл Россияны кёп регионларындан яшёрюмлер ортакъчылыкъ эте. Артдагъы йылларда Дагъыстанда туризм оьсегенге гёре, бу форумда ортакъчылыкъ этмеге сюегенлени санаву да арта.
Бетни гьазирлеген Патимат БЕКЕЕВА.
