Май айны башында алим ва янгылыкълар яратывчу Гьамит Халитов булан юртлулары ёлугъув оьтгерди. Тёбен Къазаныш юртну маданият къаласыны уллу залы жыйылгъан халкъдан толгъан. Мундагъы беш де школаны охувчу яшлары, муаллимлери, Буйнакскиден, Магьачкъаладан ва юртлардан гелген къонакълар да жыйында ортакъчылыкъ этди.

Гьамит Юсупович жыйылгъан охувчу яшлагъа оьзюню янгылыкъларыны гьакъында хабарлады. Гелген къонакълар, жамият чалышывчу Денга Халитов, Дагъыстан телевидениеде «Кунацкая» деген берилишни юрютеген Ханжан Къурбанов, «Ёлдаш» газетни баш редактору Гебек Къонакъбиев, юстицияны генералы Тажутдин Бижамов,  филология илмуланы кандидаты Агъа­рагьим Солтанмуратов ерли школаны директору Шугьайнат Абдуллаева, Магьачкъалада совет районну ветеранларыны советини председатели Агьмат Мужайитов Буйнакск районну башчысыны заместителиКамил Умаханов, Тёбен Къазанышны администрациясыны башчысы Нурутдин Ирбайынов, районда «Халкъны сеси» деген газетни редактору Муртазали Бамматов ва оьзгелер Гьамит Халитовну яшавуну ва илму чалышывуну гьакъында хабарлады, охувчу яшлагъа насигьатлар берди.

Охувчу яшлар юртлусуна гьар тюрлю соравлар бере, мекенли жаваплар ала туруп, жыйын уьч сагьатны узагъында юрюлдю ва яшлар учун пайдалы оьтдю. Олагъа алимни яратгъан янгылыкъларыны гьакъында документли фильм гёрсетилди.

 

Я. БИЙБОЛАТОВ.

СУРАТДА: ёлугъувну вакътисинде.