Ноябрни 13-нде Дагъыстан Республиканы Халкъ Жыйыныны Председатели Хизри Шихсайитов Азербайжан Республиканы Милли Мажлисини Председатели Октай Асадов булан ёлукъгъан.
Шонда Россия Федерацияны Федерал Жыйыныны Федерация Советини председателини заместители Ильяс Умаханов, Федерация Советини федерал тизимине, регион политикагъа, оьзбашына иш гёреген ерли къурумлагъа ва Темиркъазыкъны ишлерине къарайгъан комитетини председателини заместители Сергей Меликов, Россия Федерацияны Федерал Жыйыныны Пачалыкъ Думасыны депутаты Мурат Гьажиев, Дагъыстанны Халкъ Жыйыныны Председателини заместители Камил Давдиев, Азербайжанны Милли Мажлисини Председателини заместители Валех Алескеров ортакъчылыкъ этгенлер.
Оьзлени арив къаршылагъаны, дослукъда ва бирче чалышывну гьакъындагъы къол салынгъан разилешивге асасланып, азербайжанлы касбудашлар булан законлар яратывгъа гёре иш сынав алышдырмагъа берген имканлыкълар саялы Хизри Шихсайитов Октай Асадовгъа баракалла билдирген. Россия Федерацияны ва Азербайжан Республиканы арасындагъы янашывланы сыкълашдырывну ёлунда эки де якъны парламентлери юрютеген бирче иш гёрювню эки де къардаш халкъланы аралыкъларын беклешдиривде нечик уллу агьамияты бар экенин ол айрыча къыймат берип эсгерген.
Оьз гезигинде Милли Мажлисни Председатели Октай Асадов парламентлени экисини де разилешив булан беклешдирилген бирче чалышыву энниден сонг дагъы да яхшылашажагъына ва оьсежегине оьзю инанагъанын малим этген.
Ёлугъувну ахырында Милли Мажлисни генгешлери оьтгерилеген шартлар булан да къонакъланы таныш этгенлер.
Ондан алда бизин депутатлар гёз алгъа тутулгъан чараланы оьлчевюнде Милли Мажлисни илмугъа ва билим беривге къарайгъан комитетиндеги депутатлар булан ёлукъгъан. Шону барышында азербайжанлы депутатлар билим берив тармакъгъа тиеген ишлеге гёре законлар чыгъарывну оьзлердеги ёругъу булан таныш этгенлер ва шо масъалагъа гёре оьз сынавун да мисаллар булан англатгъанлар. Къаралгъан хыйлы масъалаланы арасында муаллимлеге алапалар нечик ва не къадарда токъташдырылагъаны, юрт ерлердеги муаллимлеге къошум гьакълар не меселде тёленегени, школа чагъына етмеген яшланы ожакълары нечик таъминликде экени, санавгъа аз халкълагъа ана тиллерин уьйренмеге яратылгъан шартлары ахтарылгъан. Азербайжанда санавгъа аз халкъланы ана тиллерин уьйренивге жумада 5 сагьат гёрсетиле.
Оьз гезигинде дагъыстанлы депутатлар Россия Федерациясында ва Дагъыстан Республикасында билим, илму тармакъны оьсювю, республикабызда «Земский учитель» деген проект ишге салынгъаны, шогъар иш этилип 2020-нчы йылгъа Дагъыстанны бюджетинде 50 миллион манат харж гёрсетилегени, гиччипавлагъа гьалиги замангъы арив ожакълар кёп къурулагъаны гьакъда баянлыкъ бергенлер.
Депутатланы сынав алышдырывгъа байлавлу бу ёрукъдагъы ёлугъувлары Азербайжанны Милли Мажлисини оьзге комитетлеринде оьтгерилежек.
Бизин маълумат.
