Хас асгер гьаракатда ортакъчылыкъ этегенлени игитлиги гьакъда газетни гьар номеринде беребиз. Бугюн охувчулагъа дагъыстанлы Гьажимурат Къазанбиевни гьакъында айтмагъа сюебиз.

Украина бойда юрюлеген хас асгер гьаракатны ортакъчысы Гьажимурат февральны 2-синде оьзюне гёрсетилген тапшурувну кютмек учун Донецк областны Бахмут деген шагьарыны боюндагъы Курдюновка юртну янында, демек, агьвалатлар юрюлеген бойну ал сыдраларында болгъан. Шо вакътиде оьрден учуп айланагъан дрон уьстюне граната ташлай. Эки де бутуна ва къолуна яра тийген Гьажимурат сюйкелип ювукъ арадагъы ташлангъан тёлеге гире. Къанын токътатмакъ учун яраларынкъысып байлай.

Ол ёлдашлары оьзюн къутгъарар деп тура болгъан, тек тёледе 21 бир гюн турма тюшген. Интернетден таба шо вакътиде ол телефонуна язгъан видеоларына къарайман.

–Тёледе турагъаным алтынчы гюн, шонча гюн ашама­гъанман ва сув ичмегенмен, – дей ол. – Шундан мен турагъан ерге 2,5 чакъырым ёл бар, тек юрюп болмайман, къолум ва аякъларым яралы. Шулай вакътиде бары да затны гьакъында ойлашасан… Тенгир булан оюнгда сёйлейсен… «Ол бары да адамгъа яхшы янаша… Мени къутгъармакъ учун да бир себеплер ойлашар…».

Ол бир амал этип йылышып, тёледен 4 банка тушёнка ва къуру пюре таба. Шо вакъти явгъан къар 15 градус сувукълукъ бере буса да, сувсаплыгъыны масъаласын чечме кёмек эте. Гьар гюн 4 къашыкъ аш ашай туруп, 21 гюн гете.

23-нчю февральда шолай тапшурувгъа чыкъгъан эки асгерчиге дрондан таба атышма башлай, олар да къачып шо тёлеге гирелер ва Гьажимуратны гёрелер.  Олар Петербургдан гелген асгер бёлюкню адамлары болуп чыгъа. Связист Валентин Петров ва пулемётчик Владимир Семёнов. Шолар ону уллу сакълыкъда, дронлардан яшына туруп, асгер бёлюкге етишдирелер.

Гьажимурат эки айлар госпиталларда тура, къолун сав этме бажарыла, тек уьшюген аякъларыны тюп янларын гесме тюше. Бугюн ол уьйде, бир ай алда къатын да алгъан. Агьлюсю Сапият Камилова эрин игитге гьисап­лай ва тюшген сынавну эргиши кюйде кютгенге оьктем бола.

Алдындагъы гюн ону гёрмеге Магьачкъаланы башчысы Юсуп Умавов (суратда) барды.

– «Гьажимурат гьар гелген адамны кёп сююп къаршылай, ону яшавгъа умуту бары сююндюре», – деп яза ол оьзюню Телеграм каналында. – Гёнгю де яхшы, гьар гелгенге оьзюню гьакъында сююп хабарлай. Мен огъар тынглай туруп, Алексей Маресьевни эсиме алдым. Бизин тенгли яшлар ону, давда игитлик гёрсетгенлени уьлгюсюнде оьсгенбиз. Бизин уланыбыз Гьажимурат да, ругьдан тюшмей тургъан. Гьар гелгенни «бисмилла этмей» де чыгъармай. Шагьарны администрациясындан таба огъар кёмек этилежек, савлугъун беклешдирмек, иш булан таъмин этмек масъалаланы да биз оьзюбюзге алабыз.

Гьажимурат Къазанбиев адамлагъа пайдасы болар ишде ишлеме сюе. Ону бирдагъы умуту да бар: оьзюн герти оьлюмден къутгъаргъанланы тезде къонакълай чакъырма сюе. Шо мурадын яшавгъа чыгъармакъны да шагьар администрация оьзюню бойнуна алгъан.

Игитликни тюрлю-тюрлю къайдалары бола. Гьажимуратны да яшавгъа гьасиретлиги ­оьлюмден уьст болма имканлыкъ берген. Огъар яшавуну къалгъан янын да дагъы къыйын­лыкъ гёрмей яшама насип болсун деп айтма сюебиз. Муна игит, муна оьсюп гелеген яшлагъа уьлгю!

 

Гебек КЪОНАКЪБИЕВ.