Бугюнлерде бизин республикабызда белгили пачалыкъ ва жамият чалышывчу Шихсайит Исаевич Шихсайитов тувгъанлы 90 йыл битеген юбилейге байлавлу эсделик чараланы оьтгерив давам этиле.
Арбагюн, бу йылны июль айыны 3-нчю гюнюнде, Дагъыстан Республиканы аграр центрыны бинасында эсгерилген агьвалатны гьюрметине белгили дагъыстанлы чалышывчугъа мемориал доска салынды. Шогъар байлавлу болуп оьтгерилген жыйында Дагъыстанны гёрмекли жамият ва политика чалышывчулары, оьр ва орта билим береген хас охув ожакъланы алимлери, студент яшёрюмлери ортакъчылыгъын болдурду.
Эсделик жыйынны ортакъчыларын къаршылай туруп, эсгерилген центрны директору Гьасан Догеев Шихсайит Исаевич оьз яшавунда бизин республикабызны аграр тармагъыны производствосун гётермек мурат булан мугькам илму базаны имканлыкъларын пайдаландырывда лайыкълы къошумун болдургъанын аян этди.
Дагъыстан пачалыкъ халкъ хозяйство университетни президенти Гьамит Бучаев де оьзюню сёйлевюнде Шихсайит Шихсайитов йимик бажарывлу, гёрмекли жамият ва политика чалышывчулар гьар къайсы девюрде де болгъаны гьакъда айта туруп:
– Шихсайит Исаевич оьр маданияты, тарбиясы булангъы къайратлы адам эди, – деп узатды. – Оьзюню айланасындагъыланы да хас уьлгюсю булан жамиятны ва республиканы пайдаларын якълама загьматгъа, яшавгъа иштагьландыра эди.
Эсделик юбилей жыйынны ортакъчыларыны алдында чыгъып сёйлеген Россияны илмулар академиясыны Дагъыстан илму центрыны профессору, юрт хозяйство илмуланы доктору Гьасан Гьасанов ва оьзге ёлдашлар Шихсайит Исаевични къурч гьаракаты, сиптечилиги ва бажарывлугъу булан оьз заманында бизин республикабызны аграр тармагъында гьайванчылыкъ ва шолай да къушлар оьсдюрюв булан машгъул болагъан уллу комплекслер, фабриклер къурулуп пайдаландырывгъа берилгени хайыргъа токътайгъаны гьакъда гьюрмет булан эсгермей болмады. О заман лап да гёрмекли тюшюмлер оьсдюрювде бизин республикабызда гюзлюклерден йылда биринчилей 500 минг тон бюртюк басыла ва шолай оьзге тармакъланы натижалары артмагъа башлай…
Республикабызны аграр тармагъыны масъалалары булан машгъул болгъан Дагъыстанны алдагъы вице-премьери, юбилярны уланы Мурат Шихсайитов атасыны эсделигине гьюрмет булан янашып жыйында ортакъчылыкъ этгенлеге гьакъ юрекден разилигин билдирди.
