·       

«Россияны инг яхшы педагоглары»

Магьачкъала шагьардагъы Р. Ашуралиевни атындагъы коллежни дарс беривчюлери Идрис Амиралиев ва Марьям Гьажиагьматова «Россияны инг яхшы педагогу» деген орден булан сагъатлангъан. Эсгерилген орден пачалыкъны ва жамиятны алдында кёп йыллыкъ мукъаятлы чалышыву, айрыча этген загьмат къошуму учун бериле. Ондан къайры да, «Россияны инг яхшы педагогу» деген ярыш алдынлы ерге ес болгъанланы билим берив тармакъда етишген уьстюнлюклерин ва этген къошумун жамият арагъа чыгъармакъ учун оьтгериле.

Эки де дарс беривчю эсгерилген конкурсну натижаларына гёре «Россияны гьюрметли муаллими» деген атгъа да лайыкълы болгъан. Бу ат ва ону исбатлайгъан белги. «Муаллим, педагог, насигьатчы» деген федерал проектни айланасында гьаракатчы педагог ва насигьатчы гьисапда чалышыву учун бериле.

Идрис Амиралиев шолай да миллетни билим берив чалышывуна этген касбу къошуму ва гьаракаты, оьсюп гелеген наслуну патриот ругьда тарбиялаву учун «Миллетни оьктемлиги» деген медаль булан да савгъатлангъан.

Идрис Амиралиев ва Марьям Гьажиагьматова бир агьлюде Магьачкъалада Жамалутдин ва Патимат Амиралиевлени агьлюсюнде оьсген, къызардаш-эркъардаш бир охув ожакъда чалыша.

Идрис Амиралиев 1991-нчи йыл Магьачкъала шагьарда тувгъан. Орта школаны тамамлагъан сонг Дагъыстан пачалыкъ техника университетни финанс ва аудит факультетин битдирген. 2010-нчу йылда эсгерилген университетни кафедрасында лаборант болуп чалышгъан. 2018-нчи йылдан берли, Р.Ашуралиевни атындагъы коллежде гьар тюрлю касбулагъа уьйретеген бёлюкде дарс беривчю болуп ишлей. Ол коллежде ишлей туруп, оьзюню билимлерин де артдыра.

Идрис Амиралиевни студентлери ара бёлмей гьар тюрлю ярышларда ортакъчылыкъ этип, алдынлы ерлеге лайыкълы бола. Ол Москвада оьтгерилген клас ёлбашчыланы Бютюнроссия форумуну ортакъчысы да дюр.

Идрисни къызардашы Марьям Гьажиагьматова да − Р. Ашуралиевни атындагъы коллежни дарс беривчюсю. Ол мунда ингилис дарсланы юрюте. Дагъыстан пачалыкъ педагогика университетини тыш тиллерини факультетинде охугъан. Оьзюню загьмат ёлун ингилис тиллени муаллими гьисапда Магьачкъала шагьардагъы 8 номерли школада башлагъан. 13 номерли гимназияда, финанс коллежде чалышгъан.

Коллежде ишлейген йылланы вакътисинде Марьям Гьажиагьматова педагогика ва методика советде де гьаракатчы кюйде ортакъчылыкъ эте. Республика оьлчевде оьтгерилеген чараларда ортакъчылыкъ этип, дарс беривчю гьисапда оьзю топлагъан сынавундан башгъалагъа да пай тийдире.

Ингилис тилде гьар тюрлю темаланы айланасында ачыкъ дарслар оьтгере. Ол оьтгерген ачыкъ дарслар Москвада чыгъагъан журналда печат этилген ва башгъа макъалалары гьар тюрлю журналларда чыкъгъан.

Ол гьар йыл коллежде ингилис тилни жумалыгъын оьтгере. Ондан къайры да, Марьям − «Тыш тиллер» деген охутув программаны да автору. Ону студентлери гьар йыл шагьар ва республика оьлчевде ингилис тилден оьтгерилеген олимпиадаларда алдынлы ерлени алып юрюй. Конфе-ренцияларда ва гьар тюрлю ярышларда ортакъчылыкъ эте.

Ол оьзю 2020-нчы йылда тыш тиллени уьйренивде студентлени сиптечилигини гьакъында региона­ра конференциялар оьтгерген.   2020-нчы йылда ДР-ни билим берив министерлигини Гьюрметлев грамотасы булан да савгъатлангъан.