Владимир ВАСИЛЬЕВ: «В. Путин халкъара бандит уьюрлени тозмакъ учун Дагъыстанны халкъы гёрсетген къоччакълыкъгъа тийишли багьа бере»

20 сентября 2019 в 15:42 251
Владимир ВАСИЛЬЕВ: «В. Путин халкъара бандит уьюрлени тозмакъ учун Дагъыстанны халкъы гёрсетген къоччакълыкъгъа тийишли багьа бере»



Сентябр айны 12-синде Владимир Путин, халкъара бандит уьюрлени тозгъандан берли 20 йыл тамамланагъаны булан байлавлу болуп Дагъыстангъа гелгенде, къолуна савут алып оьз республикасын якълама чыкъгъанлар гёрсетген къоччакълыкъгъа рази къалгъанын билдирген.

 

О гьакъда республиканы ёлбашчысы Владимир Васильев Дагъыстанны халкъларыны бирлигини гюнюн оьтгермек учун юрюлеген байрам чараланы вакътисинде англатыв этген.


«Шо вакъти дагъыстанлылар гёрсетген къоччакълыкъ янгыз Дагъыстангъа тюгюл, Россиягъа да бек агьамиятлы эди. Бандитлер шо заман билди халкъ бир ва сыкъ экенни. Президент булангъы ёлугъувларында адамлар пачалыкъны башчысы булан оьктем болагъанын англатды. Ол халкъара ишлени нечик юрютегенине, халкъ булан ишлеп бажарагъанына, балагь къопгъан гюнлерде ол нечик кёмек этегенине разилигин айтды. Берилген соравлагъа жавап­лар къайтарагъанда, Владимир Владимирович къайсы пачалыкъны да башчысы учун гючню ва къоччакълыкъны ругьун халкъ берегенни айрыча ташдырып эсгерди. Адамлар оьзлени Ватанын якъламакъ учун къыйынлыкълардан да оьтмеге разилигин англагъаным магъа да бек таъсир этди», – деп билдирген Владимир Васильев.


 

Максим Эсенбиев.