Алдындагъы гюн Дагъыстан Республиканы Гьукуматыны Председателини заместители А.Абдулмуслимов бизин республикада увакъ къабакъ (кабачки) ва ренкли къапуста оьсдюрювге байлавлу масъаланы арагъа салып къаравгъа байлавлу генгеш оьтгерди. Шону ишинде Дагъыстанны юрт хозяйство ва сурсат министри А.Гьюсейнов, шолай да республикада юрт хозяйство ишлер булан машгъул идараланы хыйлы ёлбашчылары ортакъчылыкъ этдилер.
Генгешде лакъырны юрюте туруп, А.Абдулмуслимов майлы оьсюмлюклени, увакъ къабакъны ва ренкли къапустаны оьсдюрмеге Дагъыстанда нечакъы бола буса да багъыйлы шартлар бар экенин англатды.
«Дагъыстан юрт хозяйство оьсюмлюклени не тайпасын оьсдюрмеге онгайлы бойда ерлешгенине де къарамайлы, бизин топуракъчылар люцернаны, майлы оьзге оьсюмлюклени, рапсны, увакъ къабакъны чачмагъа онча амракъ тюгюл, ренкли къапустаны оьсдюрюп болдурагъанлар да бир-эки адам тюгюл ёкъ», – деди А.Абдулмуслимов.
Ол малим этгени йимик, гьали Дагъыстанда болдурулагъан увакъ къабакъны алып ишлетмеге муштарлы мадарлы адамлар бар.
Ренкли къапустаны ва увакъ къабакъны болдурувгъа гёре топлангъан сынавну ва шо оьсюмлюклени гележекде оьсдюрмекни нечик хайыры болма болагъанын Дагъыстандагъы сынав станцияны директору Киштили Куркиев малим этип сёйледи.
Айрыча эсгергенде, оьсюмлюклени жураларын уьйренеген Н.Вавиловну атындагъы Бютюнроссия ахтарыв институтунда гьар йыл дегенлей ренкли къапустаны 30-дан да кёп тюрлюлери ахтарыла ва тергелип чыгъарыла. Дагъыстан сынав станция эсгерилген центрны филиалы деп санала.
Куркиев билдиргени йимик, гьали энни сынав станцияны къуллукъчулары Дагъыстанны шартларына къыйышагъан ва гелишеген мекенли токъташгъан сортланы оьсдюрмеге таклиф этип бола.
