Яшны тарбиялавну яш тувгъанча да башлама герек боладыр.  Шо саялы яшгъа инг де ювукъ адам – ана ону тюз ёлгъа салывда ва пагьмусун ачывда биринчи муаллими болуп токътай. Бара-бара бу ишге яшлар бавундагъы тарбиялавчулар ва школадагъы муаллимлер де къошула.

Алия гиччиден тутуп ана тилинде шиърулар охума, бийиме кёп сюеген къыз болуп оьсе. Ол анасыны къолундагъы нарыста заманындан берли, музыканы бек алагъан, арив макъамны эшитсе, шоссагьат къаркъарасын шогъар гёре кюйлейген къыз болуп оьсе.

Алия уьч йыл битеген чагъындан башлап, Магьачкъала шагьардагъы 73 номерли яшлар бавуна юрюме башлай. Тенглилери булан тез гелишип болагъан гиччи Алия  яшлар бавунда оьтгерилген гьар тюрлю шатлы жыйынларда актив кюйде ортакъчылыкъ этмеге башлай.  Тарбиялавчулар Алияны бийиме пагьмусу барын эс этип, яшлар бавундагъы бийимеге уьйретеген кружокгъа къошалар.

Узакъ къалмай ону тувмадан салынгъан пагьмусу арагъа чыгъа. Къурдашлары булан бирче ол яшлар бавундан тышда юрюлеген шатлыкъларда да бийимеге уллу сагьнагъа чыгъа. Мисал учун айтгъанда, бу йыл ол яшланы халкъара гюнюне багъышлангъан байрам шатлыкъларда ортакъчылыкъ этген. Уллу Уьстюнлюкню гюнюне байлавлу болуп юрюлеген байрамда да ол бийив ансамблни ортакъчысы болуп, не бийивню де уста бийиме болгъан. 

Пагьмусу артып гелеген къыз Алияны, беш йыл битгенде, «Салам» деген яшланы яратывчулукъ бийив ансамблине чакъыралар. Алия  бу ансамблге юрюйгенли 2 йыл битежек.

Гьар не якъдан да пагьмусу бар Алия ана тилинде язылгъан шиъруланы гёнгюнден уьйрене, шолардагъы чеберликни сакълап охумагъа да бажара. Бу йылны февраль айында республика оьлчевде юрюлген ана тиллени гюнюнде де ол ана тилинде чартлатып шиърулар айтып, харс урувлар къазанды.  Гележеги уллу къызыбыз Алия етмеген уьстюнлюклер къалмасын деп айтмагъа сюебиз.

 

 

 

Б. ОЬЛМЕСОВА.

СУРАТДА: Алия ана тиллени гюнюне багъышлангъан байрамда.

Сурат агьлю архивден алынгъан.