Буйнакскидеги азарханагъа шагьардан 12 чакъырым ариде ерлешген Эрпелиден агъуланып 18 адам тюшген. Оланы 14-сю гьакъылбалыкъ болмагъан яшлар. Барысыны да иссилиги гётериле, ичи бара, къурсакълары авруй. Врачланы янындан тийишли кёмек этиле. Гьали мекенли токъташдырылгъан кюйде, эрпелилер уьйлерине тартылгъан быргъылардан гелеген ичеген сувдан агъулангъан.
Шогъар байлавлу болуп район администрацияда генгеш оьтгерилген. Генгешде савлукъ сакълав министерликни, Роспотребнадзорну, ерли Водоканалны къуллукъ—чулары ортакъчылыкъ этген. Юртгъа машинлер булан таза ичеген сув ташыла.
Россияны Ахтарыв комитетини председатели А.Бастрыкинни тапшурувуна гёре, комитетни Дагъыстан управлениеси агъуланывгъа байлавлу уголовный иш ачгъан. Прокуратура да оьз янындан тергевлени башлагъан.
Буйнакск районда ва шагьарда адамлар сувну сан янына тезден берли кант эте. Эки ай алъякъда Буйнакскиде нас, зараллы микроблары булангъы сувдан 200-ден артыкъ адам агъулангъан эди.
Алав Алиев.
