Магьаммат КЪАГЬРУМАНОВ 1920-нчы йылда Къарабудагъгентде тувгъан ва 20 йыллыкъ чагъында асгерге чакъырылгъан Орёл областны Бурнинское шагьарыны боюндагъы асгер бёлюкге йиберилген. Магьаммат Къагьруманов гиччи командирлени курсларын охуй. Охуп битгенде младший сержант М.Къагьрумановну 1-нчи Украина фронтну 51-нчи полкуна пулемётчик этип белгилей. Давну башлапгъы гюнлеринде енгил яралана ва медсанбатда ятып чыгъа.
Сёз ёругъуна гёре давларда Магьаммат Къагьруманов дагъы да 3 керен яралана, гьар гезик къолай болгъандокъ, асгер бёлюгюне къайта. 1944-нчю йылда 20-23-нчю июльда Украинаны Волынск областыны Почапы ва Княже юртларын немислерден азат этмеге бёлюгю булан сержант М.Къагьруманов йибериле. Шо давларда олар 28 немисни оьлтюрме ва бир нечесин есир этме бажара. Шо игитлиги учун М.Къагьруманов «Къоччакълыгъы учун» деген медаль булан савгъатлана.
Полк дав эте туруп, Львов шагьарны азат эте ва Сербиягъа чыгъа. Шондагъы Моравица деген шагьарны агъачлыгъыны боюнда гючлю дав бола. М.Къагьруманов оьзю пулемётдан 28 немис солдатны ва офицерлени оьлтюре ва 1 пулемётун дагъыта. Шолайлыкъда, бизин асгерлеге алгъа барма ёл ачыла. М.Къагьрумановгъа бу игитлиги учун Макътавлукъну III даражалы ордени бериле.
Буланы янгыртылгъан полку 7-нчи айры мотоциклет полкгъа айландырыла. Немислени къува туруп, 1-нчи Украина фронт Берлинге чыгъа ва Потсдам шагьарына багъып йибериле.
Къыргъынлы давлар бола. Чапгъын этегенлер къаршылыкъ билдирип токътагъанлардан 3 керенге артыкъ болма герек дей. Разведкагъа йиберилген старший сержант Магьаммат Къагьруманов душманланы бёлюгюне къаршылаша ва атышма борчлу бола. Шо давда 24 немисни оьлтюрелер ва 4-вюн есир этип геле. Олар да пайдалы маълуматлар берген ва бизин асгерлеге алгъа барма имканлыкъ болгъан.
Магьамматны шо игитлиги де Макътавлукъну II даражалы орден булан къыйматлангъан.
