Етишип гюз де геле тура. Шону булан бирге оьтген ашлыкъ къайтарывну гьасиллерин чыгъармагъа онгайлы заман да геле. Бу йыл буса районну сабанчылары етишген уьстюнлюклер де яман тюгюл.
– Бабаюрт районда бу йыл гюзлюклер 1 минг 924 гектар ерге чачылгъан эди, – дей районну юрт хозяйство управленисини ёлбашчысы А. Алибеков. – Яйны яллав гюнлеринде районну сабанчылары заманында ашлыкъланы къайтардылар. Аз ерге чачылгъан буса да, олар яман тюшюм алмадылар. Савлай районда орта гьисапда гьар гектардан 25,8 центнер тюшюм алынды.
Артдагъы йыллар районлулар ашлыкъ оьсдюрювге тергев бермеге башлагъаны да юрекни сююндюре. Мисал учун, гетген йыл районну сабанчылары 1 минг 804 гектаргъа чачгъан гюзлюклени гьар гектарындан 24,9 центнер тюшюм алмагъа болгъан эди буса, бу йыл гюзлюклени гектарлары да, гьар гектардан алынгъан тюшюмню оьлчевю де артгъаны эслене. Гюзлюклени къайтарывда хамаматюртлу ва адилянгыюртлу ашлыкъ оьсдюрювчюлени къайратлы загьматы эс этиле. Эки де юртну сабанчылары бу йыл 595 гектаргъа чачгъан гюзлюклени гьар гектарында орта гьисапда 27,3 центнер тюшюм алып, 1 минг 600 тондан да артыкъ ашлыкъны беженлеге къуйгъанлар. Эсгерилген юртларда бир-бир участкаларда алынгъан тюшюмню оьлчевю 40 центнерге етише.
– Мен аслу гьалда къатты емлени топлав булан машгъул эдим, – дей адилянгыюртлу ижарачы А.Гьажиев. – Гетген гюзде ижарагъа алынгъан 4 гектар ериме будай чачдым ва гьёкюнмеймен. Умуми кюйде беженге 16 тон ашлыкъ салдым. Гелеген йыл гюзлюклени дагъы да аслам чачмагъа умутлуман.
Ашлыкъ къайтарывну гьакъында айта туруп, бу йыл районну сабанчылары ва ижарачылары ашлыкъ къайтарыв кампаниягъа тындырыкълы кюйде гьазир болагъанны эсгермеге сюемен. Шо вакътиге ягъарлыкъны багьасы артагъангъа гёре, оланы кёплери шоланы язбашдан тутуп алып гьазирлеген эдилер. Бу йыл комбайнлар булан да четимликлер чыкъмады. Мунда да сабанчыланы гьаракаты булан районгъа къырдан бир техника да гелмеди. Районну Туршунай юртундагъы машин-трактор паркында сабанчылагъа тарыкъ бары да техника бар. Дейгеним, район оьзюню гючю булан ашлыкъ къайтарывну уьстюнлю кюйде оьтгерди.
– Озокъда, заман токътамай. Гене гюзлюклени чачывну заманы да етишип гелди, – дей, мени булангъы лакъырын узата туруп, Арсен Алибеков. – Бизин бу йыл да гетген йылгъы натижалардан артда къалмагъа къастыбыз ёкъ. Районда генг кюйде топуракъ сюрюв башлангъан.
Районну юрт хозяйство управлениесинде билдирген кюйде, сабанчылар оьзлер чачагъан урлукълагъа, шону булан бирге шо урлукълар нечик тюшюм берегенге этеген тергев де артгъан. Олар болгъан сайын яхшы, макъталгъан урлукъланы чачмагъа къаст этелер. Шо саялы да бизде болдурулгъан ашлыкъ Ставрополь крайдан гелген ашлыкъдан кем тюгюл, сан яны да яман гёрюнмей. Аслу гьалда Ставрополь ва Краснодар крайлардан гелтирилген урлукъ районда яхшы тюшюм бере деп сыналгъан. Бу йыл да кёбюсю ижарачыларыбыз сыналгъан урлукъну чачмагъа къастлы. Ювукъ арада гюзлюклени чачыв толу кюйде башланажакъ.
Артдагъы йыллар районну сабанчылары юрт хозяйствону авур арбасын алгъа тартып барагъанына сююнмей болмайсан. Озокъда, къыйын. Тек къыйын тёгюп къазангъан мал къыйматлыдыр дегенлей, сабанчылар ялкъмай ишлейлер. Оланы къастлыгъы булан район да оьзюню аввал заманда етишген уьстюнлюклерин гене такрарлажакъгъа теренден инанмагъа сюесен. Шону учун районда бары да шартлар яратылгъан.
СУРАТДА: иннырда ишлер къайнай.
Автор чыгъаргъан сурат.
