Футбол булан машгъул болгъан касбучулар ва тренерлер, олай да журналистлер бу оюнну «Анжи» кёп къыйналмай утажагъына бир де шеклик этмей эди. Бизин команда, петербурглулардан хыйлы гючлю командалар булан ойнама тюшеген оюнланы гёз алгъа тутуп, кёп гючюн харжламай, оьзге командалагъа оьзлени гючлю якъларын гёрсетмей, жыйымларда уьйренген комбинацияларын яшырып ойнады.
Ачыкълашдырып айтгъанда, оюн юрюлеген токъсан минутну ичинде «Анжи» бирев де оьзюню бажарывлугъуна шеклик этмеге болмайгъан кюйде ойнады. Футбол майданны есилери «Динамо» эди буса да, оюнну хожайынлары бизинкилер эди. Оьзлени иши азгъа, команданы бир-бир чапгъынларында гьатта орта якълавчуларыбыз да ортакъчылыкъ этди. Оюнну йигирманчы минутунда биринчи топну да Илья Максимов гийирди. Ол ярымякълавчулардан пас алып, «Динамону» штрафноюну ювугъунда, бир якълавчуну да алдатып, есилени къапусуну ари мююшюне урду. Къапучуну хатасы бу урувну голгъа айландырды.
Оюнну отуз дёртюнчю минутунда майданны онг янындан берген Амаду Мутарини пасындан пайдаланып, Янник Боли оюнну санавун 0:2 этмеге бажарды. Биринчи таймда голдан сонг ойнама къалгъан он эки минутунда, толу кюйде экинчи таймны да «Анжи», биз оьрде эсгерген кюйде кёп гюч харжламайлы, къыйналмайлы оьтгерди.
Шолайлыкъда, бизинкилер уьч очко да къазанып, турнир таблицада бизин артыбыздан гелеген «Тоснодан» беш очкогъа алгъа чыкъды.
Оюндан сонг берген баянлыгъында баш тренерибиз С. А. Ташуев команда гёрсетген оюнгъа разилигин билдирди.
* * *
Арбагюн, март айны 18-нде, сувукъ чакъгъа да къарамайлы, «Анжи» футбол оюндан милли-лигада Россияны чемпионатыны 23-нчю турунда Красноярск шагьардан гелген «Енисей» деген команда булан гезикли оюнун оьтгерди. Оюнну башламакъ булан бирче гьужумгъа тутулгъан «Енисейни» къапусуна Илья Максимов уьчюнчю минутда биринчи топну гийирди.
Арадан он минут гетип, къонакъланы кёп сийрек чапгъынларыны бирисинде бизинкилени штрафноюну ювугъунда Мутари «Енисейни» орта якълавчусун чатакъ салып йыкъды. Штрафнойдан берилген пасдан пайдаланып, къонакъланы чапгъынчысы Гультяев оюнну санавун тенглешдирди.
Арадан эки минут оьтюп, башлап Янник Боли, оюнну йигирманчы минутунда Георгий Зотов, отузунчу минутда дагъы да Боли санавну 4–1-ге чыгъарды. Шолай бизинкилер экинчи таймны да башлады. Тек къонакълар бираз эс тапгъан йимик гёрюнюп, сав командасы булан оьз къапусун якълама, амалдан геле туруп, экинчи таймда дагъы гол алмаслыкъны гьайын эте башлады.
«Анжи» буса бирини артындан бири болагъан къоркъунчлу мюгьлетлерден пайдаланып бажармай турагъанда, оюнну етмиш бешинчи минутунда экинчи сари карточка алып, орта якълавчубуз Сергей Мирошниченкону судья футбол майдандан къувалады. Майданчада бир футболистге аз болгъангъа да къарамайлы, бизинкилер чапгъынларын давам этип турду.
Оюн битме беш минут къалып, сав оюнну гючлю оьтгерген «Анжини» бразилиялы легионери Да Сильва Леонардо «Енисейге» бешинчи топну гийирди. Шолайлыкъда, гезикли оюнун 5–1 санав булан тамамлап, «Анжи» премьер-лигагъа дагъы да бир абатгъа ювукъ болду.
Ш. КИШИЕВ.
Суратда: Боли ва Максимов – топ учунгъу гьаракатда.
