Яшавда оьзю башгъа касбугъа ес болма сюйсе де, ишлеме тюшген касбуну сююп къалгъанлар насипли адамлардыр. Олайлар оьзлер юрютеген ишни де гьакъ юрекден кютелер. Заманын да къызгъанмай, оьзюн де къызгъанмай этеген ишинден илгьам ала, къувана, айланасындагъыланы да сююндюре. Мени де мурадым – шоланы бирини билим алыв ва иш гьаракатын къысгъаракъ суратлап чыкъмакъ. Ол да – Дагъыстанны маданиятыны ат къазангъан къуллукъчусу Нюрия Тавфиковна САБИРЖАНОВА.

 

Нюрия Къарабудагъгентдеги орта школаны яхшы къыйматлагъа битдирген сонг анасы Лайла йимик врач касбугъа ес болмагъа гиччиден тутуп умуту болгъан. Шо умутун яшавгъа чыгъармакъ учун Дагъыстан пачалыкъ медицина институтгъа геле. Мунда охумагъа тюшме сюегенлени кёплюгюне инанып да битмейсен. Бары да жагьиллер медицинагъа къарышып къалгъан деп эсинге геле.

Нюрия бир экзаменден осал къыймат алып юртуна къайта. Ишсиз турма кюй де ёкъ. Жагьиллик, жагьлыкъ бош турма, не эте бусанг да эт дей. Огъар иш табыла. Райондагъы маданият бёлюкню заведующийи чакъырып, автоклубну ёлбашчысыны къуллугъун таклиф эте. Нюрия да чебер коллективлер булан районну юртларына барып, загьматчылагъа, юзюмчюлеге, ашлыкъ къайтарывчулагъа концертлер гёрсете, загьматгъа ругьун гётере. Гьакимлик къурумланы ёлбашчылары ону гьаракатын разилик булан къабул эте. Байрамларда гьюрметлев грамоталар тапшурула.

Москвадагъы маданият институтгъа Дагъыстандан баражакъ жагьиллер учун ерлер гёрсетилгени белгили бола. Къарабудагъгент районну маданият бёлюгю ишине намуслу кюйде янашагъан, къурч айланышлы Нюрияны охума йиберегенин билдире. 1977-нчи йылда Нюрия эсгерилген институтгъа охума тюше.

Онда охугъан беш йылны ичинде жагьил къызъяш оьзю бир де къаравулламагъан таъсирли ёлугъувланы, лакъырлашывланы ортакъчысы бола. Маданият, адабият тармакъда чалышагъан дюньягъа аты белгили адамлар булан таныш бола. Олар – Чингиз Айтматов, Иосиф Кобзон, Лев Лещенко, Булат Окуджава ва башгъалары. Сонг да, Нюрия 1980-нчи йылда Москвада болгъан Олимпия оюнланы оьлчевюнде оьтгерилеген маданият чараларда да ортакъчылыкъ этген. Кёпню гёрген кёп билер дей. Нюриягъа да уьлкебизни тахшагьарындагъы институтда охугъанлыгъы, белгили адамлар булан ёлукъгъанлыгъы, оланы насигьатлары, гьар тюрлю маданият чараларда ортакъчылыкъ этгенлиги бир оьр охув ожакъ да уьйретип болмайгъан яшав сынавланы алма кёмек этген.

Студент йылланы къайсыбыз да лап яхшы йыллагъа санайбыз. Нюрияны да студент йыллары тамамлана. 1982-нчи йылда институтуну китапхана къуллукъчуларын гьазирлейген бёлюгюн битдирип, ол юртуна къайта. Райондагъы центр­лашдырылгъан китапханагъа оператор болуп ишге тюше. Заман гетип, китапханадагъы гьар тюрлю бёлюклерде ёлбашчы болуп ишлей. 1987-нчи йылда буса китапхананы директоруну къуллугъун кютме башлай.

Халкъ арада китапхананы къуллукъчулары не ишни башына чыгъа, не къуллукъну сама кюте дейгенлер ёлугъа. Шо буса оланы пайдалы ишине бакъгъан якъда бирдокъда тюз янашыв тюгюл. Китапханачылар – билимлени хазнасын сакълап, шо хазнаны халкъ арада яйып, адамланы билим даражасын, англавун артдырып юрюйген касбучулар. Нюрия ишлейген китапханада 15 мингге ювукъ китап сакълана. Билимин, англавун артдырма сюегенлеге шо – уллу байлыкъ. Чебер асарлардан къайры, мунда гьар ким касбусуна гёре де, айры-айры тармакълагъа ба­гъышлап язылгъан китапланы алып, билимлерин артдырма бола.

Китапханада адатлы гьалда гьар йыл белгили шаирлерибизни ва язывчуларыбызны юбилейлерине, аты белгили эревюллю адамларыбызны юбилейлерине багъышлангъан чаралар оьтгериле. Шонда школаланы охувчулары да ортакъчылыкъ эте. Китапланы жумалыгъы яшлар да къуршалып къужурлу оьтгериле. Нюрия Сабиржанова онгаргъан юзден де кёп методика материаллар ва гьар тюрлю сценарийлер де районну юртларындагъы китапханаларда къолламагъа пайдалы деп гьисап этилген.

Маданият тармакъда этген гьаракаты ва халкъны китапхана булан байлавлу къуллукъларын кютювде етишген уьстюнлюклери учун Н.Сабиржанова РФ-ни маданият министерлигини баракалла билдиреген кагъызын алгъан, ДР-ни маданият министерлигини Гьюрметлев грамотасына ес болгъан. Бугюнлерде ра­йондагъы центральный китапхананы заведующийи болуп ишлей туруп, Нюрия халкъны китапхана булан байлавлу къуллукъларын кютеген район центрны директоруну заместители болуп да чалыша.

СУРАТДА: Н.САБИРЖАНОВА.