Дагъыстангъа ДР-ни туризм ва халкъ саниятларыны масъалаларына къарайгъан министерлигинден бизге билдиреген кюйде,  артдагъы маълуматлагъа гёре ял алмагъа ва савлугъун беклешдирмеге къонакълай гелеген туристлени санаву белгили кюйде артгъан. Дагъы да ачыкъ этип айтгъанда оланы санаву 2023-нчю йылда 2 миллионгъа ювукълашгъан.

Дюнья сынаву аянлашдырагъаны йимик, туристлер оьзлени сапарларында ял алмагъа онгайлы къуллукълар бар ерлени ахтара ва танглай. Шону гьисапгъа алып, бизин рес­публикабызда да ич ва тыш туризмни оьсдюрювню масъаласы тергевсюз къалмай.

Бугюнлерде оьзюнде миллионгъа ювукъ адам яшайгъан тахшагьарыбызда да «Онгайлы шагьар шартлар учун», «Мени Дагъыстаным – мени сувларым», «Мени Дагъыс­таным – мени ёлларым» деген регион ва шо ёрукъдагъы оьзге тюрлю федерал проектлени, милли борчланы оьлчевюнде къоллавчуланы онгайы учун имканлыкълар пайдаландырыла, шагьар шартлар яратылына.

Бу йыл эрте язбашда ял алыв сезонну алдында Магьачкъаланы Редуктор посёлогунда Каспий денгизни ягъасында янгыртылгъан ял алыв пляж да къуванчлы агьвалат гьисапда пайдаландырывгъа берилген эди.

Тек не этерсен, низамны болдурмагъа тарыкъ, низамсызлыкъ оьзлюгюнден де бола деген кюйде, ял алыв бойда болдурулгъан ­онгайлыкълар май айны орталарында болгъан гючлю явунлардан сонг  канализациядан чыкъгъан нас сувлар агъылып заралгъа тарыды. Лап да яманы, яман ийислер яйы­лып, ял алмагъа гелеген адамланы уьркютдю.

Республикабызны ва  Магьачкъала шагьарны башчыларыны бирлешген жыйынында шону себеплерин токъташдырмакъ учун ДР-ни  къурулуш министерлигине ва тахшагьарыбызны ЖКХ къуллукъларына  гьисап бермеге тюшдю.

Белгили болгъан кююнде, савлай республикабызда йимик, артдагъы йылларда Магьачкъалада, Каспийск, Избербаш, Дербент шагьарларда юрюлюп турагъан кёп къадардагъы яшавлукъ учунгъу къурулуш ишлер  генг кюйде давам этилине. Шолайлыкъда, бизге гелеген туристлени де гьисапгъа алгъанда артып тербейген талапланы толу юйде яшавгъа чыгъар­магъа  коммунал къуллукъланы имканлыкълары етишмей. Натижада, къоллавчулар, сувундан, газ ягъарлыкъдан, электрик токдан магьрюм къала. Уьстевюне, канализация сувлар да тыгъылып, орамлагъа, денгизге агъа… Шо да бизин айлана ягъыбызда къыставуллу гьалланы тувдура. Шогъар да ким жавап бермеге герек, къоллавчулар билмеге сюе.

 

Къ. КЪАРАЕВ.

СУРАТДА: агьвалат болгъан ерден, Редукторный посёлокда зараллангъан  «ял алыв» пляж.

Автор чыгъаргъан сурат.