Гьар йыл Дагъыстанны билим берив ва илму министерлигини гёрсетивюне гёре, ана тилинде дагъыстанлы авторланы шиъруларын охув конкурс оьтгериле. Шо конкурс ана тиллени, милли адатланы сакъламакъ ва оьсдюрмек, яшланы англавун артдырмакъ ва пагьмуланы аян этмек, шолай да патриот ругьда тарбияламакъ учун оьтгериле.
Оьтген жумада Хасавюрт шагьарны школаларыны охувчуларыны арасында шо конкурсну муниципал тирети тамамланды.
Конкурсну ортакъчылары шиъруланы чебер охуп, жюрини ва тынг-лавчуланы тергевюн тартма болдулар.
Къумукъ шиъруланы охувда Хасавюртдагъы М.Горькийни атындагъы гимназияны 11-нчи «б» класыны охувчу къызы Мадина Залдыкова (суратда) биринчи ерни алды ва грамота булан савгъатланды. Конкурсгъа Мадинаны гьазирлеген муаллим Юлдуз Гьажаматова билдирген кюйде, Мадина Дагъыстанны халкъ шаири А. Жачаевни «Ана булан савболлашыв» деген шиърусун охугъан.
Муниципал конкурсну утгъанлар 20-нчы февральда Магьачкъалада оьтгерилежек республика оьлчевдеги конкурсда ортакъчылыкъ этежеклер.
Мадинагъа буса гезикли конкурсда утмакъны ва янгы оьрлюклеге етишмекни ёрайбыз.
Г.БЕК.
