Дагъыстанны Халкъ Жыйыныны артдагъы сессиясында ДР-ни экономика ва территорияланы оьсюв ишлерине къарайгъан министерлигини башчысы Гьажи Солтанов чыгъып сёйлеген. Ол регионну экономикасыны башгъа-башгъа тармакъларында далапчылыкъ булан онгача машгъул болагъанлагъа этилинеген налог тёлевдеги енгилликлер 2024-нчю йылда да узатылажагъы гьакъда айрыча эсгерген.
– Налог енгилликлер бир башлап бизин республикабызда далапчылыкъны оьсдюрювге байлавлу болуп да пайдаландырыла, – деген министр. – Неге десегиз, экономиканы яшыртгъын тармагъына бойсынагъан далапчы тайпалар пачалыкъ береген кёмек харжлардан ва шолай да налог енгилликлерден магьрюм къала. Гьалиги заманда Дагъыстанда далапчылыкъны ва инвестиция агентлигини далапчылыкъгъа кёмеклешив центрини сиптечилиги булан байлавлукъда онгача иш гёрегенлер бизнес планланы къуруп хайыргъа чалышагъаны гьакъда айрыча эсгермеге сюер эдим. Уьстевюне, оьтген йыл йимик бу йыл да енгил промышленностну тармагъында аякъгийимилер, опуракъ тигив булан машгъул болагъан усталар йимик, спорт клублар ва шолай да савлукъ сакълав центрлар, илму-ахтарывлар юрютювде ортакъчылыкъ этеген тайпалар налог тёлевлерден толу кюйде эркин этилине.
Къ. КЪАЗАКЪМУРЗАЕВ.
