Багьавутдин ГЬАЖИЕВ,

Дагъыстанны халкъ шаири.

 

Янгъан майчыракъ йимик ирий туруп гетди эсги болгъан 2023 — нчю йыл. Гетген йыл мени халкъым учун сююнчлеринден къайгъылары кёп йыл болуп чыкъды. Украина бойда юрюлеген хас асгер гьаракаты адамланы яшав гьалларына эсде ёкъ пуршавлукълар гелтирди. Булай дав гьаракатлар, адам адамны оьлтюрювлер токътамай туруп яхшы яшавну болдурма бек къыйын.

Бу хас асгер гьаракатларда ортакъчылыкъ этген гьар къоччакъ улангъа, атагъа инг алда эсенлик — аманлыкъ ёрамагъа сюемен. Оланы гьарисине уьйлеринде бозарып турагъан агьлюлерине къайтмагъа насип болсун. Адамлар насипли яшама герек. Яшав олагъа гючлю талаплар сала. Озокъда, адабиятгъа, маданиятгъа яшавун багъышла­гъан адамлагъа,янгы йылны геливю айрыча таъсирли, оланы юреклерине айрыча сююнч, айрыча къуванч гелтиргенден къайры, уллу умутлар булан да толтура.

Дюнья адабиятыны уллу вакили, айтылгъан машгъур шаир Низами, Янгы йыл гелеген гече, адамланы юреклериндеги бары да тююнлени чечмеге имканлыкъ береген гече, деген.  Мени аявлу, жанымдай азиз къумукъ халкъымны, чечилмеген кёп масъалалары, кёп юрек тююнлери бар. Шо тююнлер геч-эрте чечилип, мени оьзден халкъым кёп-кёп яхшылыкълар, парахат яшав гёрер деп умут этемен ва янгы йылны ярыгъы булан бирче шу сатырларымны багъышлайман:

 

«Янгы йыл гелген гече

Къар басып чыкъды къалкъым.

Янгы  йылда яшасын

Янгыгъа гьасирет халкъым.

 

Элинг болмакъ — уллу иш,

Элсиз къалсам — торайман

Янгы йылда элиме

Парахатлыкъ ёрайман».