Украина бойда бизин уьлкебизге янгы къошулгъан рес-публикаланы халкъларыны аманлыгъын сакълап хас асгер гьаракат юрюлегени 2 йылгъа ювукъ болуп тура. Шонда минглер булан дагъыстанлылар да ортакъчылыкъ этелер. Къоччакълыгъы учун уьлкени оьр савгъатларын алгъанланы санаву мингден де оьтген. Бугюн шоланы бириси, эрпелили Марат Муратович Батыргишиевни игитлиги гьакъда хабарлама сюебиз.
Марат Батыргишиев 2000-нчи йылда Эрпелиде тувгъан. Юртдагъы школаны 2017-нчи йыл битдире ва Буйнакскидеги педагогика коллежни физкультура бёлюгюне охума тюше. Шону охуп бите ва 2020-нчы йылда асгерге чакъырыла.
Асгерде ярым йыл оьтгенде дыгъар байлап къуллугъун давам эте. Дав агьвалатлар башлангъанда Маратны асгер бёлюгюн Донбассгъа йиберелер. Огъар «Град» деп реактивный зарп урагъан топлары булангъы машинни гьайдама тапшуралар. Шо машини булан ол салынгъан борчланы намуслу кюйде кютюп тура. «Град» машин топ булан юкленгенде, 13 тондан да артыкъ бола. Шону тез гьайдап, тюз ерде токътап атышмакъ ва шо ерден тезликде таймакъ учун уллу усталыкъ тарыкъ. Бары да топлар атылап 20 секунддан бите. Атышгъан ерден таймаса, шо ерге къайтарып атышма да болалар.
Шолай бу йыл яйда ону машинине зарал бола. Огъар къаршы атыша ва яллата, тек Марат тартынмай, яшланы да тюшюрюп, яллап турагъан машинин оьзенге гийирип, яллайгъанын токътата. Шо игитлиги учун Россияны Президентини Указы булан ол Жуковну медалына лайыкъла бола.
Йылны экинчи яртысында Марат къуллукъ этеген асгер бёлюк миллетчилени гьужум этеген боюна йибериле. Шонда да бу асгер бёлюк алдына салынгъан борчланы намуслу кюйде кюте.
Бирдагъы бир тамашаны да айтма сюемен. Маратны атасы Мурат да гетген йыл гёнгюллю кюйде хас асгер гьаракатда ортакъчылыкъ этме гетген эди. Огъар бир керен уланы булан ёлукъма имканлыкъ да болгъан.Муратгъа март айда 50 йыл битген. Ол гьали отпускагъа гелип уьйде, ону асгерден къайтарып къоймакълыкъ да бар…
Эки айлар алда, 19-нчу октябрде, Маратны экипажы атышып къайтып токътагъанда, буланы асгер бёлюгюне кассетли бомбалар ташлана. Бомбаланы бириси асгер ёлдашлары бар блиндажгъа тюше ва яллама башлай. Марат тартынмайлы блиндажгъа гире, четим этеген аркъалыкъланы тайдырып, бир ёлдашын чыгъара. Биревюсюн чыгъарма гиргенде оьзюне де гюч бола. Болса да ону чыгъара ва оьзю де бишип гьалсыз болуп йыгъыла. Тезликде оланы госпитальгъа етишдире. Маратны башыны, къолларыны, бутларыны ва къаркъарасыны 50 проценти бише.
– Госпитальда кёмек этме болмагъанда, авиацияны къоллап, ону Санкт-Петербургдагъы бишгенлеге къарайгъан больницагъа салды, – дей мени булангъы телефон лакъырында уллатасы Гьюсен Гьюсенов. – Бек бишген бары да ери. Мени къызым, ону анасы Зугьра, уланын багъып 1 ай больницада туруп къайтды. Кюю яман тюгюл гьали. Атасы Мурат барыбыз да таныйгъан белгили йырав Вали Валиевни къызардашындан къалгъан улан.
Маратны шу игит иши учун Къоччакълыкъны орденине гёрсетген. Бары да зат арив де битип, улан уьюне къолай болуп къайтып гёрме насип болсун!
Г.БЕК.
