Дагъыстанны Оьр судунда Арслан Къурбановну уголовный ишине къаралгъан.
Судгъа бакъдырылгъан материаллагъа гёре, 2020-нчы йылны декабр айында Москвадагъы шагьар суд ол машинин эсирип гьайдагъан саялы шагьатнамасын чыгъарып алмакъ деген къарарны къабул этген болгъан. Тек шогъар да къарамай, А.Къурбанов Дагъыстангъа къайтгъанда машинин хумар кююнде гьайдайгъан къайдасын токътатмагъан.
Сулейман-Стальск район суд А.Къурбановну гьёкюнгенин гьисапгъа алып, ону бир йылгъа шарт булан эркинликден магьрюм этмек деген къарарны чыгъаргъан болгъан. Шо къараргъа гёре, А.Къурбанов гьар айда аманлыкъны къоруйгъан къурумлагъа гелип оьзюню барлыгъын тасдыкъ этмеге борчлу болгъан. Тек шогъар да ол жавапсыз янашгъан. Тойларда аргъан согъуп къазанмакъны оьзю учун артыкъ гёрген.
Оьр суд район судну къарарын гери ургъан ва А.Къурбановну бир йылгъа эркинликден магьрюм этмек деген гьукмугъа гелген. Огъар гележек йылын туснакъда оьтгермеге тюшежек.
Алав АЛИЕВ
