Магьаммат Пайхаммарны (алайгьи салам) аты эсгерилген гьар гезик огъар: «Салла-ллагьу алайгьи ва саллам», – деп салават салмакъ.
Магьаммат Пайхаммарны (алайгьи салам) яшавун билмек ва ахтармакъ. Магьаммат Пайхаммар (алайгьи салам) тувгъан кююн, ону тухумун, агьлюсюн, ата-анасыны атларын, къатынларын ва яшларын, яшаву булан байлавлу хабарланы билмек.
Болгъан чакъы кёп: «Аллагьумма салли гьала саййидина Магьаммат ва гьала али саййидина Магьаммат», – деп салават салмакъ яхшы.
Магьаммат Пайхаммаргъа (алайгьи салам) ва ону агьлюсюне, асгьабаларына ва оланы артына тюшгенлеге лап яхшы кюйде ва сююп янашмакъ.
Магьаммат Пайхаммарны (алайгьи салам) сюннетине гёре юрюмек. Шолайлыкъ Есибизге бакъгъан сюювню, Ол да бизин сюегенни белгиси бола.
Адам Пайхаммардан беш ёрав
Белгили алимлер айтагъангъа гёре, Адам Пайхаммар уланы Шисгъа ва оьзге уланларына беш ёрав къоюп гетген. Тюпде шолар бизин охувчуланы тергевюне бериле:
Биринчиси: «Бар барлыкъгъа таянып, оьз-оьзюнге инанып къалма ва гележегинг булутсуз болургъа алданмагъа ярамайгъанны бил ва авлетлеринге етишдир. Неге тюгюл, мен де даим женнетде леззет чегип туражакъман деп алдангъаным саялы, ондан чыгъарылдым».
Экинчиси: «Къатынларыгъызны умутларыны, сюйгенлерини, гёз къаравларыны артына тюшмегиз. Мен къатынымны сюйгенлерине ва гёз къаравларына таби болуп, къадагъа этилген терекден ашадым ва сонг шо гьакъда кёп-кёп гьёкюндюм».
Уьчюнчюсю: «Не зат буса да этмеге токъташсагъыз, гьукмугъуз нечик айланажакъгъа ойлашыгъыз. Эгер мен этген ишим негер гелтирежекни гьакъында ойлашгъан эдим буса, шу гьалгъа тарымас эдим».
Дёртюнчюсю: «Эгер юрегигизде (жаныгъызда) талчыкълыкъ, гьалеклик тувса, рагьат турмагъыз, сакъ болугъуз. Къадагъа этилген терекни емишин ашайгъанда, юрегимни къайгъылы талчыкъ ва гьалеклик къуршагъан эди. Амма мен гери урулгъан ишни узатдым ва сонг шо гьакъда кёп гьёкюндюм».
Бешинчиси: «Не зат буса да этмеге токъташгъанча, бир башлап айлана якъдагъы гьакъыллылар булан гьакълашыгъыз. Эгер мен емишни ашагъанча, бир башлап малайиклер булан гьакълашгъан эдим буса, авур ва къыйынлы бу гьалгъа тарымас эдим».
Насрулла БАЙБОЛАТОВ.
