Аманлыкъны къоруйгъан къурумлар билдиреген кюйде, Приморск крайны Уссурийск шагьарында ахшам вакъти белгисиз жинаятчылар адилянгыюртлу (Бабаюрт район) Артур Индирчиевни оьлтюрген.
Ол оьзюню «Лэнд Крузер» машини булан уллу тюкенни алдына гелип токътагъан болгъан. Шо мюгьлетде жинаятчылар огъар ювукъ болуп, бир нече керен тапанчалар булан атышып, авур яралар салгъан. Ону алгъасавлу кюйде ювукъдагъы азарханагъа етишдиргенлер, тек врачлар нечакъы къаст этсе де оьлюмден къутгъарып болмагъан. Полицейскийлер ахтарывланы башлагъан.
Артур Индирчиевни аты Приморск крайда яхшы танывлу. Ол бир вакътилерде бу бойларда асгерде къуллукъ этген. Ватаныны алдындагъы борчун кютген сонг, Уссурийскиде къалгъан, далапчылыкъ булан машгъул болгъан, Приморск крайдагъы Дагъыстанлыланы вакиллигини ишинде жанлы кюйде ортакъчылыкъ этген.
Алав АЛИЕВ.
