Дагъыстан Республиканы Башчысы Сергей Меликов Украина бойда юрюлеген хас асгер гьаракатда гёнгюллю кюйде ортакъчылыкъ этме гьазирлигин билдирген «Каспий» батальонну ортакъчылары булан ёлукъгъан. Шо ёлугъувда Буйнакск районну башчысы Уллубий Ханмурзаев де ортакъчылыкъ этген.
«Каспий» батальонгъа къуршалгъан асгерчилени сыдраларына Буйнакск райондан оьзлер сююп къошулгъан 5 де асгер къуллукъчугъа разилигин билдире туруп, Уллубий Ханмурзаев олар булан герти кюйде оьктем болагъанын айтгъан ва Ватанны алдындагъы къуллугъун оьр даражада кютюп, кёп сюеген агьлюлерине эсен-аман къайтмакъны ёрагъан.
— Герти ватандашлыкъ, патриотчу гьислеригиз учун сизге гьакъ юрегимден баракалла билдирме сюемен, оьзюгюз танглагъан къуллукъну уьстюнлю кюйде кютюп яшама яратгъаныбыз савлукъ да, насип де берсин, — деген Уллубий Ханмурзаев.
«Каспий» батальонгъа къуршалып, хас асгер гьаракатда ортакъчылыкъ этме разилигин билдиргенлер уьч жуманы боюнда юрюлежек гьазирленив чаралардан оьтген сонг оьзлени алдына салынгъан аслу тапшурувланы кютме гиришежеклер.
Казим КЪАГЬРУМАН.
