Герменчик
Дагъыстанлылардан къурулгъан «Каспий» деген гёнгюллю батальонну сыдраларына къошулгъанланы арасында 57 йыллыкъ герменчикли (Бабаюрт район) Измутдин Гьажиев де бар. Измутдин хыйлы йыллар район администрацияда жаваплы къуллукъларда ишлеген.
Бу танглагъан ёлуну гьакъында айта туруп, ол: «Озокъда, бары да ювукъ адамларым къаршы эди. Тек бугюн Ватаныбызны гележегине уллу къоркъунчлукъ тувулунгъанда, мен ягъада туруп болмайман», – деген.
Измутдинни асгер ёлуна узатма дос-къардашы, юртлулары, иш ёлдашлары жыйылгъан. Олар огъар эсен-аман уьюне къайтмакъны ёрап, ол ареклердеги агьвалатларда ата-бабаларыны макътавлу ишлерин ер этмежегине бек инанагъанын айталар.
Белгили кюйде, гьали батальон толу кюйде къурулуп битген ва «Терик» батальонгъа къошулуп, хас асгер гьаракатда ортакъчылыкъ этмеге башлажакъ.
Буйнакск
Яшавда адамлар къаравулламагъан кюйде юз тюрлю хатабалагьгъа тюшмеге бола. Муна шо заман ону янына врачлар етишгенче, башлапгъы медицина кёмекни этип болагъанлар табулмакъ – бек агьамиятлы.
Шону гьисапгъа алып, «Биринчилени гьаракаты» деген Бютюнроссия жамият къурумну Дагъыстан бёлюгю 14-17 йыллыкъ охувчу яшланы арасында республиканы чемпионатын оьтгерме токъташгъан.
Ярышларда Буйнакск районну атындан Тёбен Къазанышдагъы лицейни ва Къадардагъы орта школаны бирлешген командасы ортакъчылыкъ эте. Яшлар инг алдын соравлагъа жавап берген. Сонг, гьар тюрлю къыйынлы гьалгъа тарыгъанлагъа башлапгъы медицина кёмек этивде гьюнерлерин гёрсетген.
Буйнакск районну командасы чемпионатны натижаларына гёре гьюрметли 2-нчи ерни алгъан.
Къызылюрт
Къызылюрт район администрацияны къуллукъчулары «Рагьму-лукъну гюз жумасы» деген чарагъа къошулуп, оьзюнде къыйынлы яшав гьалгъа тарыгъан, ата-анасыны янындан тергевсюз къалгъан яшлар сакъланагъан центрда болгъанлар.
Яшланы янына олар бош бармагъанлар, гьарисине савгъат табулгъан. Тек лап да къужурлу ва рагьмулу агьвалатлар гелген къонакъланы савгъатлар оьлешинип битген сонг, сиптени яшлар оьзлени къолуна алгъанда гёрюнюп къалды. Олар бийивлерде, йырлавда, шиъру охувда, къысгъа масхара хабарлар айтывда гёрсетген гьюнерлери уллуланы шайлы гёнгюн ача, кюлете, гьатта бирлерин гёзьяш тёкмеге де борчлу эте.
Район администрацияны вакиллери, центрны къуллукъчулары яшлагъа гьакъ юрекден баракалласын билдирген.
Алав АЛИЕВ.
