Бугюнлерде яшлар учун эки айда бир чыгъарылагъан «Къарчыгъа» журналны гезикли бешинчи номери  басмадан  чыгъып охувчулагъа етишди.

 

Журналны башлапгъы бетлеринде мактап яшавгъа  багъышлангъан шиъру ва хабар асарлар ерлешдирилген. Ачыкълашдырып айтгъанда, Дагъыстанны халкъ шаирлери Анвар ва Багьавутдин  Гьажиевлени шиъруларына, олай да Насрулла Байболатовну хабарына журналда ер берилген. Шондан сонг берилген «Оьмюр бою оьз халкъына къуллукъда» деген гиччирек макъалада  адабият тармакъда Дагъыстанны Пачалыкъ савгъатына ес болгъан, кёп йылланы боюнда «Къарчыгъа» журналны  жаваплы редактору болуп тургъан ДР-ни халкъ шаири Шейит-Ханум Алишеваны атына къутлав сёзлер айтылып, яшлар учун  ол яратгъан шиърулар салынгъан. Шолар булан бирге бу йыл оьзю тувгъанлы 80 йыл тамамланагъан къумукъланы машгъур шаири Бадрутдин Магьамматовну гьалиге ерли бир де басмадан чыкъмагъан асарлары оьзлеге ер тапгъан. Белгили къумукъ шаир, язывчу, драматург ва журналист Абзайдин Гьамитов тувгъанлы 85 йыл битегенликге байлавлу ону шиърулары да яш охувчуланы тергевюне берилген. Олар дагъы да журналны бетлеринде «Эшек, эчки ва къоян» деген халкъ ёммагъын охумагъа болажакъ. Чечеген ёммакълар да оланы иштагьландыражакъгъа бир де шеклик этмейбиз.