Нюргьида ЧЕРИВОВА:
«Комсомол тарбия бергенге бек оьктеммен»
Комсомол деген къурумну гьакъында бизин гьалиги яшёрюмлерибизни англаву да ёкъ деме ярай. Тек оланы уллаталары ва улланалары о гьакъда кёп маъналы сёзлер айтма бола. Алда, Совет Союзну заманында, партияны алдына салынгъан юрт хозяйствону янгыртывну борчларын кютювде идеология якъдан бирлешген яш наслуну яшавунда, комсомол бек агьамиятлы ерни тутгъан.
Биз бу гюнлерде, шо къурулгъан гюнюню юбилейинде, шо къурумну ал сыдраларында болгъан бабаюртлу Нюргьида Шагьсолтановна Черивованы эсгермеге сюебиз. Н. Черивова 16-нчы мартда 1955-нчи йылда Бабаюртда тувгъан 1972-нчи йылда. Школаны битген сонг, Дагъыстан Пачалыкъ педагогика институтуна охума тюшген. Ону тамамлагъан сонг ол охуйгъан яшёрюмлени Бабаюрт комсомолну район къурумуну бёлюгюню ёлбашчысы-секретары, 1980-1984-нчю йылларда буса Бабаюрт район комитетини экинчи секретары этилип белгилене. Сонг юртдагъы 1 номерли яшлар бавуну заведующийи, 1987-1989-нчу йылларда буса «Татаюрт» совхозну парткабинетини заведующийи, 1989-1990-нчы йылларда КПСС-ни райкомуну идеология бёлюгюню инструктору болгъан.
2002-нчи йылда буса Нюргьида Шагьсолтановна районну архив бёлюгюню заведующийи этилип белгиленген. Бугюнлерде Н. Черивова «Бирлешген Россия» деген къурумну ёлбашчысыны секретары болуп ишлей.
«Комсомол къурумну ишине къуршалыв – о девюрде яшагъан гьар яшёрюмню эсинде къалажакъ. Неге тюгюл, биз о гюнге яхшы кюйде гьазир болуп, ВЛКСМ-ни Уставын уьйрене эдик. Комсомолну члени болмакъ учун бары да ерде биринчи болмагъа тарыкъ эди: охувда да, класда ва школада оьтгерилеген гьаракатларда да, спортда да. Лап аслусу – ВЛКСМ-ни Уставын кютюв бизин жаваплы эте эди. Биз сюймеймен, этмеймен, болмайман деген сёзлени билмей эдик. Иш тапшурулдуму – тырнашып да, ону кютмеге герек эдик. 1970-1980- нчи йылларда ВЛКСМ яш наслу учун жагьлы алгъа талпындырагъан бир гюч эди. Шону сыдраларында болгъангъа, комсомол тарбия алгъангъа мен бек оьктеммен», – дей Нюргьида Шагьсолтановна.
Биревлер учун комсомолну бугюнгю юбилейи – яш заманын эсге салыв, сагъындырыв. Башгъалары учун – яхшы гюнлер, гележекге умутлар. Биз комсомол къурумну тапшурувларын кюте туруп чыныкъгъанланы барын да гьакъ юрекден юбилей булан къутлайбыз.
Гёзел ГЬАСАНОВА
