Къарабудагъгент районда юзюм оьсдюрюлеген майданлар бугюнлерде 2 минг гектарлардан да артыкъ. Ерли загьматчылагъа къазанч ва бюджетлеге лайыкълы къошум береген мердешли юзюмчюлюк тармакъ янгыдан ­оьс­ювню ёлуна тюшгени нечакъы бола буса да яхшы.

Артдагъы йылларда районну юзюм оьсдюрюлеген тарлавларындан къайтарылагъан тюшюмлени натижалары да шону ачыкъдан ташдыра. Оьтген йыл 25 минг тон татли емиш къайтарылгъан эди буса, бу йыл 28 минг тон тюшюм алмагъа умут бар. Шо да айны ахырларына таба толу кюйде гьасиллери чыгъарылгъан сонг малим этилинежек.

 

Эсгерилген районну юзюм оьсдюрювчюлери борлагъа сююп къуллукъ этегени сынавда ачыкъ болуп гёрюне. Хайырлы, кёп йыллыкъ юрт хозяйство оьсюмлюк оьзю де гьалал къуллукъ этеген –  леге къайтарышын этмей къоймай.

Шо гьакъда бугюнлерде «Къарабудагъгентни борласы» деп тагъылып оьтгерилген шатлыкъ фестивальда да ачыкъдан эсгерилди.

Оьтгерилген шатлы жыйынны «Къарабудагъгент район» деген муниципал къурулувуну башчысы Магьмут Амиралиев ачды.

– Юзюм болдурувну гьюрметли усталары ва олагъа абур этип гелген къонакълар, шулай гёрмекли агьвалатда ортакъчылыкъ этегенигиз учун айрыча рази­лигимни билдиремен, – деди районну баш гьакими оьзюню сёйлевюнде. – Юзюм оьсдюрювде борчларына бажарывлу кюйде яна-шагъанланы етишген уьс­тюнлюклери булан къутлайман ва гележекде де олардан уьлгюге лайыкълы дагъы да гёрмекли натижаланы къаравуллайман.

Районну юзюмчюлюк тарма­гъыны оьсювюнде не йимик имканлыкълар пайдаландырылагъаны гьакъда районну юрт хозяйство управлениесини начальниги Шагьабутдин Мустафаев де оьз пикруларын айтды.

– Емиш тереклер ва шолай да юзюм борла орнатагъанлагъа тёкген къыйынына, чыгъаргъан харжына гёре пачалыкъны янындан кёмек этилине, – деди ол.– Уьстевюне, толу тюшюм береген даражасына етишгинче де 5-6 йылланы ичинде тёгюлген загьматына гёре пачалыкъны янындан харж булан къайтарыш алагъаны бав салма муштарлыланы дагъы да иштагьландыра.

Алгъа салынгъан борчларына юзюм, емишлер, овощлар оьсдюрювде «Герей-Тюз» деген агрофирманы башчысы Канзитдин Канзитдинов жаваплы кюйде янашагъан сынавлу касбучу. «Шанс» деген сабанчы-фермер хо-зяйствону башчысы Зиявутдин Абдуллагьатов да юзюм борла оьсдюрюлеген майданларыны гьар гектарындан 150 центнерден артыкъ тюшюм къай-тарагъаны гьакъда айрыча эсгермеге тюше.

– Бугюнгю фестивальда юзюмню нече тюрлю журасы малим этиле? – деген соравгъа Шагьабутдин булай жавап берди.

– Районда юзюмню кёп тюрлюлери оьсдюрюле, бугюн шоланы арасындан лап сайламлыларыны 11 журасы аян этилди.

Юрт хозяйство продукцияны оьсдюрюп къойгъан булан иш битмей. Къайтарылгъан тюшюмлени ишлетивню, сакълавгъа салывну ва сатывгъа чыгъарывну масъаласы да тергевсюз къалмагъа тюшмейгени гьакъда да фестивальда пикру алышдырыв юрюлдю, гележек учун пайдалы таклифлер берилди.

Юзюм борланы байрамында ортакъчылыкъ этген Къарабудагъгент, Буйнакск, Гуниб ва Дахадаев районланы милли ашлар биширив, халкъ ва шолай да инче саният усталары оьзлени пагьмуларын аян этип, айлана якъда­гъыланы да баракалласын къазандылар.

 

Къ. КЪАРАЕВ.