Адил Янгыюрт

 

Россияны Президенти В.Путинни къарарына гёре, Украина бойдагъы хас асгер гьаракатда биринчи гюнлеринден тутуп ортакъчылыкъ этеген адил янгы­юртлу (Бабаюрт район)  Нариман Гьажиев экинчи керен «Къоччакълы-гъы учун» деген медаль булан савгъатлангъан. Биринчи савгъат Наримангъа бу йылны август айыны башларында  берилген эди.

Арадан оьтген эки айны ичинде тавакаллы улан украинли илбислеге ва миллетчилеге къаршы ябушувларда асгер ёлдашларына уьлгю гёрсетип, даим ал сыдраларда юрюген, душманны гюллесинден, топ яркъычындан бюдюремеген. Озокъда, Н.Гьажиев къуллукъ этеген асгер бёлюкню командованиеси шону эс этмей къоймагъан ва къоччакъ дагъыстанлыны бирдагъы савгъатгъа гёрсетген.

Бугюнлерде Нариман агьлюсюню, дос-къардашыны янында. Ол ябушувланы бирисинде яралангъан болгъан. Тек ону башлагъан ишин ярты ёлда туварып къоймагъа хыялы ёкъ. Яралары сав болгъанда  къайтып асгер бёлюгюне къошулма сюе.

 

Боташюрт

 

2016-нчы йылдан тутуп республикада Дагъыстан маданиятыны ва тиллени гюню белгилене. Аслу мурады-жамаатны, айрокъда оьсюп гелеген яш наслуну ана тиллени, милли мердешлени, маданиятны  уьйренивге муштарлы этмек, Ватаныны тарихине байлавлу оьктем ва гьюрмет этив гьислени тувдурмакъ.

Шо гюнге байлавлу болуп Боташюртну  (Хасавюрт район) ерли китапханасында «Маданият.Тил.Мердешлер» деген чара оьтгерилген.

Китапхананы къуллукъчусу Саният Айтекова жыйылгъанлагъа ана тилни билмекни ва сакъламакъны агьамият­лыгъыны гьакъында айта туруп, алда къумукълар не байрамланы къаршылай болгъанын ва шо байрамлагъа не ашланы  гьазирлеп гелегенин хабарлагъан.

Тилге, мердешлеге байлавлу чара къужурлу, эсде къалардай кюйде оьтген.

 

Мажалис

 

Гьайдакъ районну гёзел табиатыны тамаша ва гьайран ерлери аз тюгюл. Шоланы бириси къалын орманлыкъны ичинде ерлешген, арсланкъапланны башына бек парх береген уллу яр.

Далапчыланы бирисини сиптечилиги булан шо ерде «Арслакъапланны башы» деген турист комплекс къурулажакъ.

Проектге гёре, ял алыв базада 50 номери булангъы къонакъюьй ва агъач­дан этилген 20 айрыча уьйлер, оьзюне 400 адам сыягъан ресторан къурма гёз алгъан тутулгъан. Ондан къайры, комплексде яшлар учун спорт майданчалар болажакъ. Уьстевюне яяв гезевлер учун, 5 ва 10 чакъырым узунлугъу булангъы сокъмакълар онга­рылажакъ.

Бары да ишлер 500 миллион манатгъа токътажакъ.

 

Алав АЛИЕВ