Ботаюрт

 

Республиканы «Россия-мени тарихим» деген музейинде «Халкъларыбыз кёп – уьлкебиз бир» деген конкурсну гьасиллери чыгъарылгъан. Конкурс артдагъы уьч йылны ичинде Дагъыстанны милли политикагъа ва дин ишлеге къарайгъан министерлигини сиптечилиги булан оьтгериле.

Бу йылгъы конкурсгъа  150-ден артыкъ яратывчулукъ ишлер берилген эди. Видео­роликлени арасында жюри  бир тавушдан къабул этген къараргъа гёре,  биринчи ерни «Дуа» деген ролик алгъан.

«Дуа» Украинадагъы хас асгер гьаракатларда ортакъчылыкъ эте туруп, гетген йылны язбаш айларында игит кюйде жан берген ботаюртлу (Хасавюрт район) Зиявудин Аджиевге багъышлангъан. Роликни ону ювукъ адамлары гьазирлеген.

Шогъар узакъ къалмай бизге де къарамагъа имканлыкъ болар деп умут этебиз.

 

Бабаюрт

 

Алдындагъы гюнлер Москва областны Красногорск шагьарында жиу-житсудан (Латин Америкада тувулунгъан ябушувну журасы) Россияны чемпионаты оьтгерилген. Чемпионатгъа уьлкени гьар тюрлю регионла-рындан  эки  минге ювукъ лап сынавлу спортсменлер гелген болгъан.

Ярышларда Бабаюрт спорт школаны командасы да ортакъчылыкъ этген ва тизив натижалагъа етишген. Шамил Юсупов (95 кило.) Салим-Мурза Зубаилов (100+ кило.) ва Шагьсолтан Алакаев чемпионлукъ атланы къазангъан. Ражап Алиев (100+ кило.) уьчюнчю ерге ес болгъан.

Айрыча эсгермеге тюшедир, Россияны чемпионатында алдынлы ерлени алгъанлар дюньяны чемпионатында ортакъчылыкъ этежек.

 

Къарабудагъгент

 

Районну гьар тюрлю юртларындан Украинадагъы хас асгер гьаракатларда ортакъчылыкъ этегенлени ва оьлгенлени яшлары ва оланы ювукъ адамлары ат чапдырагъан спорт клубда болгъан. Клуб Агъачавулну гёзел еринде ерлешген.

Яшлар клубну ичинден гезеп чыкъгъан, олагъа атланы гьар тюрлю жураларын  гёрсетгенлер ва гьарисине атгъа минип гьайдама имканлыкъ бергенлер. Оланы клубгъа этген сапары хыйлы замангъа эсинде къалажагъына шекленме тюшмей.

Бу рагьмулу чара Дагъыстанны Халкъ Жыйыныны депутаты Магьаммат  Магьамматовну сиптечилиги булан оьтгерилген. Магьаммат гьар тюрлю сахават ишлерде ортакъчылыкъ этегени биринчилей тюгюл.

 

Башлыгент

 

Башлыгентдеги маданият центр юртдагъы китапхана булан бирче эсли адамланы бютюндюнья гюнюне байлавлу шатлы чараланы оьтгерген.

Тамазалагъа ва апайлагъа ерли артистлени гючю булан концерт гёрсетилген, шиърулар охулгъан, хыйлы исси къутлавлар ва ёравлар айтылгъан. Ондан къайры, «Алтын чагъына етишгенлер» деген аты булангъы выставка оьтгерилген.

Шу байрам янгыз эсли жамиятгъа тюгюл, оланы ювукъ адамларына да яныгъыз­да даим тергевню ва гьайлы янашывну талап этегенлер бар экенни эсине сала.

 

Алав АЛИЕВ