Магьамматрасул Жаякъаев 1986-нчы йыл Буйнакск районну Тёбен Къазаныш юртунда Гьайбулланы ва Умразиятны агьлюсюнде тувгъан. Ата-ананы биргине-бир уланы, ёнкюп-шашып турмай, яш чагъынданокъ уллугъа гьюрмет этип, гиччини якълап оьсе, тапшурулгъан къуллукъну оьз заманында яшавгъа чыгъарып юрюй.
Тёбен Къазанышдагъы 2 номерли орта школаны охуп битдирген сонг ол асгерге чакъырыла ва Екатеринбург шагьарда ич асгер бёлюклерде 2 йыл бою къуллукъ этип старший сержант чин алып ата юртуна къайта. Мунда ол тенглилери булан бирге агъач ишлетеген цехлеге барып, эринмей загьмат тёге.
2010-нчу йылны сентябр айында, юртундагъы кёбюсю жагьил уланлар йимик, Магьамматрасул да асгер бёлюклерде къуллукъ этме токъташа. Узакъ къоймай контракт да язып, Мычыгъыш республиканы Борзой шагьарындагъы асгер бёлюкде къуллукъ этме башлай.
2022-нчи йылны январ айында Магьамматрасул Жаякъаев къуллукъ этеген асгер бёлюкню, Украина бойда баш гётерип турагъан миллетчилени намарт къастларыны алдын алып токътатма гьазирлик гёрсюн учун Къырымгъа бакъдыралар. Огъар Запорожьени боюнда ва Донецк областда КамАЗ машини булан командирлени тапшурувларын тайышывсуз кюйде яшавгъа чыгъарма, асгер ёлдашларын савут, сурсат ва оьзге тюрлю тарыкъ-герек алатлар булан уьзмеген гьалда таъмин этмек буюрула. Ол да асгер къуллукъдагъы борчларына жаваплы кюйде янаша, кютме герекли гьар тапшурувну гьеч бир сёз табылмасдай, мекенли этип яшавгъа чыгъара.
Асгерде къуллукъ этеген болжалны ичинде оьзюн гьар-бир ягъындан яхшы гёрсетеген, борчларын жаваплылыкъ булан кютеген Магьамматрасул Жаякъаевге Россияны оборона министрини буйругъу булан Жуковну, «Темиркъазыкъ Кавказда юрюлген ябушувланы ортакъчысына» «Асгер макътавлугъу учун» деген медаллар берилген 2023-нчю йылны 4-нчю февралында буса огъар «Давда оьзюн айрыча гёрсетгени учун» деген медал тапшурулгъан.
Россияны Президенти В.В.Путинни Указы булан Магьамматрасул Жаякъаев Суворовну атындагъы медалгъа, шу йылны август айыны 28-нде бирдагъы Жуковну медалына да лайыкълы болгъан.
Украина бойда къуллукъ эте туруп, Магьамматрасул Жаякъаев уьч керен заманлыкъ отпускагъа гелип, ата-анасын, агьлюсю Женнетни, бирини артындан бири оьсюп-торайып гелеген авлетлери Аминатны, Динисламны ва гиччи къызы Умразиятны гёрюп, оланы да сююндюрюп, оьзюню де сагъынгъанын басылтып гетген. Отпускагъа берилген гюнлери битгинче де къарамайлы, ол асгер бёлюгюне, ёлдашларыны янына етишмеге алгъасагъан.
Армияны сыдраларына чакъырылгъан гьар жагьил улан ана Ватанына амин болуп, гьалал кюйде къуллукъ этермен деп ант берегенлик эжел заманлардан берли адатланып гелген. Магьамматрасул Жаякъаев де оьзю шолай ант этген мюгьлетни не эсинден, не оюндан тайдырмай сакълагъан.
Ол шо бир керен берген антына амин болуп юрюйгенине, асгерлик борчларына къаны-жаны булан янашагъанына, дав гьаракатны ал сыдраларындагъы ёлдашларындан бир мюгьлетге де айрылмай, оланы арасында таш багъанадай болуп токътама гьазир турагъанына, ону ойлашып басагъан гьар абаты арив шагьатлыкъ эте.
Казим КАЗИМОВ.
СУРАТДА: Магьамматрасул Жаякъаев ва ону савгъаты.
