1943-нчю йыл 23-нчю августда Курск бойда Уллу Ватан давну инг де къагьрулу деп гьисапланагъан урушларыны бири болгъан. 50 гюн юрюлген шо давда эки де яндан 4 миллионгъа ювукъ адам ортакъчылыкъ этген, 70 минг топ, 13 минг танк ва 12 минг самолёт къоллангъан. Тарихге шо дав «Ялынлы жая» (Огненная дуга) деп гирген. 100 минг асгерчи орденлер-медаллар булан савгъатлангъан, 231 адамгъа Совет Союзну Игити деген сыйлы ат берилген.

Совет асгерлер шо урушда немислени аркъасюегин сындыргъан ва олагъа дагъы ­айынмас кюйде зарал этген. Шо давдан сонг немис асгерлер уьстюнлюкге умут уьзген ва артгъа тартылма башлагъан.
Гьар йыл август айны ахырында шо тарихи эсделикни гюню оьтгериле. 80 йыллыгъына башгъышлангъанында Россияны Президенти В.Путин де ортакъчылыкъ этди.

Ол Курскну тюбюндеги Поныри деген юртда оьтгерилеген чарагъа жыйылгъанланы къутлады ва совет асгерлер гёрсетген тенгсиз игитликни гьакъында айтды.

–Экинчи дюнья давну инг де къайнар ери шу бойлар болгъан, – деди В. Путин.– Бу урушну даражасын къыйматлама къыйын, неге тюгюл Курскну тюбюнде нацистлеге къаршы дав этип, къоччакълыкъ гёрсетген совет асгерлер оланы гючюн чартлатгъандан къайры, ругьун да сындыргъан.

Уллу аталарыбызны макътавлу ишлерин бугюнлерде оланы авлетлери давам эте. Бугюнгю къыйынлыкълар, Уллу Ватан давда йимик, ал ­сыдраларда дав этеген уланланы инбашларына тюшген. Олар къоркъунчсуз, тартынмай дав эте ва берген антына амин болуп, азиз Ватанын сакълайлар.

Сёйлевюнден сонг В.Путин хас асгер гьаракатда къоччакълыкъ гёрсетгенлеге пачалыкъ савгъатлар тапшурду.

Курск давну 80 йыллы­гъына Поныри юртну боюнда уллу архитектура композиция этилинген. Шонда эки яндан совет асгерлени аралама къарайгъан немислени чапгъынына къаршы туруп, къоллары булан теберип токътагъан солдатны памятниги бар. Тарих такрарлана. Алда йимик, гьалиги бизин асгерлер де дюнь­яны елеме сюеген террорчулукъгъа къаршы тургъанлар.