Сыйлы касбугъа къуллукъ этегенлени байрамы
Бу йыл Россияда къурувчуну гюню август айны экинчи къаттыгюню 13-нчю августгъа рас геле. Бизин зор уьлкебизде сыйлы касбугъа къуллукъ этегенлени гьюрметине биринчилей байрам шатлыкълар 1956-нчы йылны август айыны 12-нчи гюнюнде оьтгерилген.
Тарихи сынав ташдырагъан кюйде, сыйлы касбугъа ес болгъан къурувчулар тезги заманлардан тутуп яшавлукъ-экономика тармакъда гёрмекли натижалагъа етишген. Яшавлукъ агьамияты булангъы къурулуш эсделиклер бизин уьлкебизде совет девюрден тутуп гьали де пайдаландырывгъа бериле гелегени гьакъда айрыча эсгермеге тюше.
ы натижасында къурулгъаны ва пайдаландырывгъа берилгени белгили.
Макътавлу мердешлени ругьунда Россияны оьзге регионларында йимик, бугюнлерде бизин республикабызда да гьар тюрлю къурулушлар генг кюйде оьтгериле ва къоллавчуланы онгайына пайдаландырывгъа бериле. Алдан берли адатлангъаны йимик, къурувчуну гюнюнде арадан оьтген вакътини ичинде этилинген ишлени натижалары гёзден гечириле, гележек учун жаваплы борчлар къабул этилине. Сыйлы тармакъны лап лайыкълы къурувчулары байрам гюн материал ва ругь якъдан иштагьландырыла.
– Артдагъы 30 йылланы ичинде бизин республикабызда да къурулуш ишлер генг кюйде оьтгерилегени тергевню тартмай болмай, – деди ДР-ни къурулуш, архитектура ва ЖКХ министри Артур Сулейманов. – Яшавлукъ ва производство биналар къурув давам этилине. Пайдаландырывгъа берилеген яшавлукъ квадратметрлени майданлары да йылдан-йылгъа къолайлашып геле. Шону булан янаша федерал ва регион оьлчевдеги агьамиятлы проектлер, пачалыкъ программалар милли борч гьисапда яшавгъа чыгъарыла. Магьачкъала темир ёл, гьава, сув ва шолай да ерден юрюйген транспортну имканлыкъларын артдырывгъа да тергев гючлене, янгыртыв-ярашдырыв ишлер оьтгериле.
«Асил ёллар-аманлыкъны ёллары», «Онгайлы шагьар шартлар учун». «Таза сув» деген федерал ва шолай да «Мени Дагъыстаным-мени ёлларым», «100 школа» ва шолай оьзге регион программалар айлана якъдагъы талапланы гьисапгъа алып, аманлыкъ учун оьтгериле демеге ярай.
Республикабызны баш къурувчусу Артур Абдулманапович сыйлы тармакъда лап да тарыкълы касбугъа ес болуп чалышагъанланы байрамы булан къутлай туруп, озокъда, пайдаландырывгъа берилеген квадрат-метрлени санаву булан дазуланмайлы, ишлени сан янын артдырывгъа аслу тергевню бакъдырма тюшегени гьакъда да айрыча эсгерди. Дагъысын айтмагъанда, тарихи сынав ташдырагъаны йимик, кёпюрлени къуруп толу кюйде пайдаландырывгъа бергенче, къургъанлар кёпюрню тюбюнде токътап уьстюнден машинлени. поездлени оьтгере болгъан.
