Бырынгъы заманлардан берли адам загьматы булан абурланып, сыйланып гелген. Шо мердешлер гьали де узатыла. Къарабудагъгент районну администрациясыны гезикли жыйынында районну башчысы Магьмут Амиралиев шатлыкъны шартларында Имамутдин Агьматович Чамсаевге «Дагъыстан республиканы ат къазангъан врачы» деп берилген оьр атны шагьатнамасын тапшурду.
И.Чамсаев Къарабудагъгент районну Дёргели юртунда тувгъан. 1973-нчю йылда Къарабудагъгент орта школаны яхшы къыйматлагъа тамамлап, Дагъыстан медицина институтгъа охума тюшген. Оьр охув ожакъны тамамлагъан сонг, 1982-1987-нчи йылларда Къарабудагъгент район больницада врач болуп ишлеген.
Имамутдин Чамсаевни касбу бажарывлулугъун, къурумчулукъ пагьмусун гьисапгъа алып, районну ёлбашчылары ону 1987-нчи йылда район больницагъа баш врач этип белгилейлер. Шо къуллукъда ол 9 йылдан къолай ишлеген.
1997-2007-нчи йылларда «Каспий» санаторийни директору-баш врачы болуп ишлеген.
Ондан сонг 10 йыл болгъунча «Къарабудагъгент район» муниципал районну башчысыны орунбасары болуп, районну социал экономика оьсювюне, ватандашланы талапларын яшавгъа чыгъарывда намуслу кюйде загьмат тёкген.
2017-нчи йылдан буссагьатгъы замангъа ерли район больницада врач болуп загьмат тёге, адамланы савлугъун беклешдиривде, сав этивде топлангъан бай сынавун къоллап загьмат тёге ва районлуланы разилигин къазанып ишлей.
