Дагъыстанны ёлларындагъы низамсызлыкъ артдагъы вакътилерде бек арта бара. «Бек» деген сёзню негьакъ къолламайман. Бир гюнню ичинде, май айны 21-нде, республикада болгъан ёл хатабалагьларда 6 адам оьлген, яралангъанлар – эки керенге де артыкъ.

 Къайгъылы агьвалатлар гече сагьат бирге юрюп Дербентде Тагьиевни атындагъы орамда башланды. «Хундай» маркалы машин 35 йыллыкъ жагьил адамны уруп йыкъгъан. Ол авур яралардан эсине гелмей азарханада оьлген.

Арадан 10 минут да гетмейли, Магьачкъаланы Гьамитовну атындагъы орамында бек чалт гелеген «Жигули» орамдан чыгъып барагъан 75 йыллыкъ эсли адамны уруп йыкъгъан. Огъар да врачлар кёмек этип болмагъан.

Гюндюз вакъти Къызлар районда «Жигулини» жагьил гьайдавчусу машинин бек чалт гьайдап, ёлда сакълап болмай, ойтангъа тюшюп авлангъан. Хатабалагьда эки адам оьлген.

Арадан кёп заман да гетмей, «Кавказ» федерал ёлну Хумторкъали районундан оьтеген бойларында беш машин бир-бирине урунгъан. Хатабалагьда 7 адам яралангъан ва бир адам оьлген.

Тюшден сонг Дербентде Гагаринни атындагы орамда «Приора» «Порше» маркалы машинге урунгъан. Хатабалагьны натижасында «Приорада» болгъан жагьил адам шо ерде оьлген.

Ахшам вакъти, сагьат еттилеге юрюп, «Кочубей – Минеральные Воды» деген ёлда бек чалт гелеген «Приора», ёл низамны бузуп, бетге-бет уллу автобусгъа урунгъан. «Приораны» гьайдавчусу шо ерде оьлген.