Артдагъы гюнлерде иш сапарыны вакътисинде республиканы Башчысыны Орта территория округдагъы вакили Шамил Зайналов, Къарабудагъгент районну башчысы Къапур Исаев ва ону заместителлери Къарабудагъгент районну Уллубийавул юртунда болду.
Уллубийавулда къонакълар белгили инкъылапчы У.Буйнакскийни атындагъы музейге гелди. Оьсюп гелеген наслуну патриот ругьда тарбияламакъ учун оьр даражада бай материал жыйылгъан музей юртну инг яшыл, гёзел еринде ерлешген. 1980-нчи йылда ачылгъан гюнюнден берли, музей район администрациясыны кёмеклиги булан ва айры адамланы, юртуну, миллетини патриотларыны къол ялгъаву булан иш гёрюп тура. Шолай адамлардан бири Зайнутдин Магьамматов бугюнлерде музейге ёлбашчылыкъ этип, ону гьар гюнлюк масъалаларын чече.
Музейни жыйымында, ону сёзлерине гёре, 642 экспонат бар, оланы 570-и аслу фондуна гире. Экспонатланы арасында Уллубий Буйнакскийни яшаву булан байлавлу документлер, кагъызлар, о замангъы яшав-туруш булан байлавлу предметлер бар. Олардан къайры да, бийлени отаву болгъан бырынгъы къумукъ юрт Уллу Бойнакъны тарихинден башлап, бугюнгю Уллубийавулну тарихине байлавлу экспонатлар да музейни фондун бирден- бир бай ва къужурлу этген.
Гелген къонакълар музейни ёлбашчысы З.Магьамматовгъа оьтгерген заманы пайдалы болгъаны саялы да, шо ругь байлыкъ сёнмесин деп чалышагъаны саялы да разилигин билдирди.
Ругьаният МУСАЕВА.
