Сорав – жавап
– Машин гьайдавчуланы шагьатнамасыны (права) болжалы битген буса, нечик тез алышдырма бола? Шоланы МФЦ-ден алышдырып да бола дей…
– Гьайдама ихтияр береген шагьатнаманы заманы битген буса ва машин гьайдап тутулсанг, 5-15 минг манат къоду салына. Машинни де хас ерге сала.
Эгер де сен шагьатнамангны алгъанлы 10 йыл оьтген буса ва шону болжалы 2022-нчи йылны башындан 2023-нчю йылны ахырына ерли бите буса, ихтиярынг дагъы да 3 йылгъа узатыла.
Болжалы битгенче шагьатнаманы нечик алышдырма бола?
Шону учун ерли ГИБДД-ге шагьатнамангны, паспортунгну, медицина справкангны, госпошлина тёлеген чегингни ва арза бересен.
Шо ишни «Госуслуга» деген порталдан таба да этме бола, тек медицина тергевлерден чыкъгъан справка болма герек.
* * *
– Ишсизлеге берилеген кёмекни даражасы нечакъыдыр ва шону нечик алма бола?
–Шону алмакъ учун адамланы иш булан таъмин этеген центрда гьисапгъа алынма герек. Шону да бир нече къайдада эте:
«Госуслуги» яда «Работа России» деген порталдан таба;
ювукъда ерлешген иш булан таъмин этеген центргъа оьзюнг барасан.
10 гюнню ичинде сагъа бир тюрлю иш таклиф этиле ва таныш болмакъ учун чакъыра. Эгер де эсгерилген иш къурум сени къабул этмесе, сагъа кёмек бериле. Кёмекни инг де азы – 1500 манат, шо да 3 айгъа гёрсетиле.
Кёмекни инг де кёбю – 12792 манат. Шолай акъча ишсиз къалгъанлагъа 3 ай, сонг 6 ай 5 минг манат бериле.
* * *
– Гьали тюрлю-тюрлю программалагъа гёре кёп санавдагъы къурулушлар юрюле. Юрт хозяйство министерлиги не йимик программалагъа къошулгъан?
– Юрт хозяйство министерлигине юртларда онгайлы шартлар болдурмакъ учунгъу программа тапшурулгъан. Демек, ёлланы, яшланы бавларын ва спорт майданчаланы ярашдырма, шолай да машинлер токътайгъан ерлени ва адамлар ял алагъан ерлени гьазирлемек тапшурулгъан. Шолай, «Ерли сиптечилик» деген программагъа гёре 2022-нчи йылда 979 проект яшавгъа чыкъгъан ва миллион санавдагъы адамгъа онгайлыкълар тувулунгъан.
* * *
– Хас медицина центрлагъа къан берип тургъанлагъа акъчалар берилеми?
– Шо акъчаны алмакъ учун, адамны «Почётный донор России» деген белгиси болма герек.
Федерал медико-биология агентлиги билдиреген кюйде, 1-нчи апрель болгъанча шо акъчаны Россияда 500 минг адам алажакъ. Акъчаны оьлчевю – 16 578 манат, шо да йылда бир керен бериле.
Толу кюйде шу адрес булан билме бола: (https://www.gosuslugi.ru/help/faq/donor/102288).
