Янгы йылда яхшылыкълар кёп болсун!
Гьар гелеген Янгы йыл бизин барыбызны да умутлар булан байлайгъанда йимик бола. Гёз алгъа тутулгъан ишлени яшавгъа чыгъармакъ деген пикру къайсы ёлбашчыны да оюндан таймай. Янгы йыл башланагъанда, айрокъда шо гьакъда кёп ойлашасан.
Бизин учун 2022-нчи йыл яман болмады. Етишген натижаларыбыз бар. Хыйлы ишлер этилинди. Тек оланы этилме гереклилери дагъы да кёп. Аслу борч – гетген йыл йимик, гелегенинде де халкъны яшав шартларын яхшылашдырмакъ. Гьар тюрлю тармакъланы оьсювюн болдурмакъ.
Озокъда, къайсы тармакъ да агьамиятлы. Районну оьлчевюнде юрт хозяйство, туризм, билим берив, савлукъ сакълав тармакълар йимик, яшавлукъ масъалаланы да унутмайбыз. Ватандашланы таклифлерин де гёз алгъа тутуп, шо ёрукъда ишлеме алданокъ гьазирленген программаларыбыз бар. Натижалар да 2023-нчю йылда, гетген йыл булан тенглешдиргенде, артыкъ болур деп эсибизге геле.
Бу Янгы йылда, биринчилей, районну, республиканы ватандашларына кёп-кёп яхшылыкълар ёрайман. Инг аслусу – жамият арада дослукъ, татывлукъ сёнмесин, берекет кемимесин. Гьар кимге де гёз алгъа тутгъан яхшы умутларына, негетлерине етишме насип болсун!
Буйнакск районну администрациясыны башчысы
Абидин Къарчыгъаев.
