Бизин уьлкебизде октябр айны уьчюнчю къаттыгюнюнде ёл хозяйство къуллукъчуланы касбу байрамы гьисапда оьтгерилегени 20 йылдан да артыкъ бола. Арив онгарылгъан ёлланы агьамиятыны гьакъында айтып турмайыкъ, неге тюгюл шо – гьакъ зат.
Дагъыстанда янгыз федерал ёлланы узунлугъу 642 чакъырымдан да артыкъ. Йыл сайын машинлени санаву арта. Р-217 «Кавказ» федерал ёлдан суткада 20- 35 минг машин оьте. Машин кёп болгъан сайын, хатарлар да арта. Оьтген йылда Дагъыстанны ёлларында 1384 хатар болгъан, шонда 307 адам оьлген, яртысындан да кёбю – яшлар. Хатарланы кёп яны ёлланы гьалындан себепли бола. Федерал ёлланы 1-нчи даражадагъы къалипге чыгъарып, гьар янгъа экишер машин юрюйген кюйде этмекни масъаласы арагъа чыгъа.
2022-2024-нчю йылларда шо масъала чечилип бите деп айтма ярай. Янгыз 2021-нчи йылда республика гьисапдагъы 24 чакъырым ёл ярашдырылгъан. Бу йыл шо ишлер дагъы да яхшылашды. Четим тав шартлары булангъы Дагъыстанда да «Мени Дагъыстаным – мени ёлларым» ва «Аманлыкъны къоркъунчсуз ёллары» деген регион ва федерал пачалыкъ программаланы оьлчевюнде кёп иш этилип тура. Янгыз ёллар тюгюл, кёпюрлер де къурула. Шо буса ёллардагъы къоркъунчлукъну аз эте.
Мычыгъыш Республикадан Азербайжан дазугъа ерлиги Р-217 «Кавказ» деген ёлдагъы къурулушлар да кёп зат: «Темиркъазыкъ-Къыбла» деген халкъара агьамияты булангъы транспорт коридоргъа байлавлу къурулуш ишлер давам этилине.
Хасавюртдан Магьачкъалагъа ерли ёлланы 4 тюрлю къурулуш юрюте, олар гюндюз чю нечик де, гечелер де ишлейлер. Гележекде Дербент ва Хасавюрт шагьарланы айланып ёллар этмеге де гёз алгъа тутулгъан.
Гьали республикабызгъа гелеген туристлени санаву йыл сайын арта. Ёл арив буса, ял да яхшы болар дегенлей, шо бойлагъа элтеген ёллар яхшылашгъан сайын, бизин гёзел Ватаныбызгъа гелгенлени гёнгю де арив болар. Дагъы да гелме сюегенлени санаву артар.
Мен юрюген ёл алар, токътагъан ял алар деген айтывну эсгергенде, Дагъыстанны транспортуну ва ёл хозяйствосуну министри Жамболат Салавов: «Ял алма ва токътама заман ёкъ, гьали де этилме герек кёп иш бар», – деди ва тезде юрюлюп турагъан ишлени гьакъында «Ёлдаш» газетге баянлыкъ бережегин айтды.
