1960–1968-нчи йыллар юрт школада билимлер алгъан бизин наслубузну да оьрде эсгерилген касбулардан шайлы ва мекенли англавлары бар эди. Сонггъу яшавубузда биз школада охуп алгъан касбу билимлерден ва сынавлардан толу кюйде пайдаланып да турдукъ.
Тёбен Жюнгютейдеги орта школада эсгерилген йылларда охувчу яшланы гьар тюрлю касбуланы сырларына уьйретип чалышагъан С.А. Шамилов, оьзю танглагъан касбуну шонча да яхшы биле ва кёп сююп муштарлы кюйде юрюте эди чи, гьатта биз, яшлар, огъар бир сигьручугъа йимик къарай эдик.
Сапиюлла Шамилов бизин юрт школада 55 йыллагъа ювукъ заман загьматны дарсларын юрютюп турду, гьар тюрлю касбулагъа бакъгъан якъда яшланы терен сюювюн ва гьасиретлигин уятма бажарды.
Ол ата юртундагъы орта школада ишлей туруп, охувчуланы янгыз загьматны дарсларына тюшюндюрюп къоймай, олагъа трактор – машинлерден, электротехникадан, оьзге тюрлю усталыкълардан да башлапгъы англавланы сингдирме бек гьаракат эте эди. Ол гьар дарсгъа бек тындырыкълы кюйде гьазирлене, яшланы тамаша этер йимик янгылыкъланы къоллай, гьар яшгъа ачып-чечип англатыв берме бажара.
С. Шамиловну муаллимлик чалышыву охувчуланы загьматгъа уьйретив булан тамамланмай. Ол дарсдан тышдагъы сагьатларында юный техник ва яш конструктор, электрик деген кружокланы да бек уста кюйде юрютген. Бу кружокларда яшлар оьз къолу булан этген машинлени, алатланы макетлери район ва республика выставкалагъа йибериле ва гёрсетиле. Оланы кёбюсю юртну музейинде тамаша экспонатлар гьисапда сакъланып да тура.
Сапиюлла Амиралиевични яшавда генг англавлары ва гьюнери барлыгъын исбатлайгъан, ону пагьмусуна кёплени мюкюр этеген бирдагъы далиллени гелтирмей болмайман. Ону тарбиялав гьаракаты янгыз загьматгъа уьйретив дарслар булан битмей эди. Ол инчесаният булан да бек муштарлы адам. Хас кружоклар къуруп, яшланы агъачкъомуз сокъма да уьйретип, оланы маданиятгъа бакъгъан сюювюн уятып турду.
Сапиюлланы бажарывлу, уста къоллары этип болмайгъан гьюнер де ёкъ эди. Ол бузулгъан сагьатланы енгил ярашдыра, не тюрлю маркалы телевизорну тетигин табып, шоссагьат онгара.
Ол бизин юртгъа электрик ток тартылагъанда, шо ишни инг яхшы билеген, бажарагъан касбучулардан болуп чыкъды. Кёбюсю юртагьлюлени уьйлерине ярыкъ тартгъан адам Сапиюлла эди.
Оьзюне не иш тапшурулса да, Сапиюлла бир заманда да уллулукъ этмеген, гьар тапшурувну кёп сююп, бажарып яшавгъа чыгъаргъан. Шоллукъда, юрт агьлюлерини абур-сыйын къазангъан.
Намуслу ва бажарывлу загьматы учун Сапиюлла Амиралиевич Шамилов кёп керенлер тюрлю даражадагъы гьюрметлев грамоталар булан савгъатлангъан. Яш чагъында анасы булан бирче немис-фашист елевчюлеге къаршы окоп къазыв ишлерде ортакъчылыкъ этгени саялы огъар «Кавказны якълагъаны учун» деген медаль ва «Давну ветераны» деген гьюрметли белги де берилген.
Чинкдеси, Тёбен Жюнгютей юртда Сапиюлла Шамилов касбу сайлама, уста болма кёмек этмеген, къол ялгъамагъан, насигьат бермеген гьеч бир инсан да ёкъдур. Мени гьисабымда, къолу билген, гьюнерли, уста адамны яшаву узакъ, ярыкъ ва насипли болмагъа тийишли. Биз де бажарывлу муаллимибиз Сапиюлла Амиралиевичге узакъ оьмюр булан савлукъ ёрайбыз. Сизин уьлгюлю, сыралы дарсларыгъыз бизге буссагьатда да ёл гёрсете, ярыкъ бере.
Агъав АГЪАЕВ,
Тёбен Жюнгютей юрт музейни къуллукъчусу.
СУРАТДА: Сапиюлла Шамилов булангъы ёлугъувну вакътиси.
