Шо милли варисликни сакълавда Хумторкъали районну маданият къуллукъчулары кёп иш эте. Мунда гьар йыл «Энемжая», «Йырлайгъан къыллар», «Дагъыстан – бизин ортакъ уьюбюз» деген республика оьлчевюндеги фестиваллар ва конкурслар оьтгериле. Къоркъмаскъаланы маданият къаласында иш гёреген оьзбашына чалышагъан «Сарихум» деген яшланы бийив ансамбли республикадан тышда да белгили. Ансамблни яшлары кёп тыш пачалыкъларда да оьзлени гьюнерлерин гёрсетген.

Октябр айны 8-нде Къоркъмас­къала юртну маданият къаласында Маданиятны йылыны оьлчевюнде оьтгерилген «Дагъыстан – бизин ортакъ уьюбюз» деген патриот йырланы республика фестивалын Дагъыстан Республиканы маданият министерлиги, онда иш гёреген халкъ яратывчулукъну республика уью, Хумторкъали район администрациясыны ва районну маданият управлениесини  къурумчулугъу ва ёлбашчылыгъы булан болду.

Фестивальда Хумторкъали, Бабаюрт, Хасавюрт, Буйнакск, Къарабудагъгент, Къаягент, Къызылюрт, Тарумовка районланы чебер коллективлери ортакъчылыкъ этди.

Фестивальны ача туруп, Хумторкъали район администрацияны башчысыны заместители Марат Жанбалов, маданият министрини кёмекчиси Патимат Абакарова, районну маданият управлениесини ёлбашчысы Мадина Къанаматова фестивальны ортакъчыларын патриот йырланы байрамы булан къутлады, яш наслуну тарбиялавда патриот йырланы нечик уллу агьамияты барны айтды.

Фестиваль Хумторкъали районда янгы къурулгъан М. Бамматхановну атындагъы хорну артистлерини чы­гъышы булан башланды. Фестивальда ортакъчылыкъ этген халкъ хорлары ата юртуна, Дагъыстангъа, Россиягъа багъышлангъан патриот йырланы йырлады.

Фестивальны бары да ортакъчыларына Маданият министерлигини гьюрметлев грамоталары ва Хумторкъали район администрацияны янындан эсделик савгъатлар берилди.

 

 

 

Жават ЗАКАВОВ.

СУРАТДА: Къоркъмаскъаладагъы М. Бамматхановну атындагъы эргишилени хору.