Аявлу ветеранлар!
Темиркъазыкъ-Кавказ федерал округну гьюрметли ватандашлары! Кёп къан тёгюлген давну агьвалатлары йыл сайын адамланы оюндан ариге гете бара. Тек бир заманда да уллу пачалыкъны къайсы еринде де юрюлген давларда бизин солдатлар гёрсетген къоччакълыкъ, игитлик халкъны эсинден таймажакъ. Бир окопну ичинде орус да, украинли де, татар да, мычыгъыш да, бурят да, чергес де оьзюню жаны-къаны булан Уьстюнлюкню гюнюн ювукъ этме деп ябушгъан.
Уллу Ватан давну майданларында Совет Союзуну халкъыны азатлыгъы да, эркинлиги де сакълангъандан къайры, дослукъну, хоншу аралыкъланы беклешдиривню аслу принциплери де уьст болду. Дюньяны елемек учун къанлы ябушув башлагъанланы муратлары, умутлары болмагъандай ёкъ этилди.
Гьали бугюнлерде де шо нацист къылыкълагъа къуллукъ этегенлер болса да, оланы гележеги ёкъ экени ачыкъ. Неге тюгюл, дюнья халкълары шо нацизм балагьдан къутулмакъ учун кёп къыйын тёкгени унутулмагъан. Дюньяны яртысы ону эсинде сакълайгъаны бираз алда ООН-да «Къырым масъаласына» къарайгъанда да аян болду.
Буссагьатгъы вакъти Россияда яшайгъан гьар-бир адамгъа, не янындан болса да, ветеранлардан уьлгю алмакъ учун себеплер бар. Биринчилей, оланы оьз Ватаны булан бирлигин англайгъанлыкъ. Ортакъ иш учун гьаракатын болдуруп, ахыры гелгинче токътап билегенлик.
Гьалиги жагьил наслу да бизин гьюрметли ветеранларыбыз къазангъан абур-сыйны оьзлени де оьмюрлеринде тюшюрмей сакълап билегенлигине мен инанаман.
Россия пачалыкъны абурун-сыйын иш булан, экономика якъдан, алимлик даражадан, спортдан гётерип болагъандай, тарыкъ болса, биз ону гючюбюз булан якълап да боларбыз.
Уьстюнлюкню гюню – байрамыгъыз къутлу болсун!
Александр Хлопонин,
РФ-ни Гьукуматыны Председателини заместители,
РФ-ни Президентини Темиркъазыкъ-Кавказ
федерал округдагъы толу ихтиярлы вакили.
Уьстюнлюкню байрамы – бизин халкъны сыйлы байрамы!
Бизин солдатланы, халкъны да игитлик ишлери Ватанны тарихине къоччакълыкъны, патриот ругьну, дослукъ аралыкъланы уьлгюсю болуп язылгъан.
Дагъыстанлылар оьзлени аталары, уллаталары дав майданда гёрсетген къоччакълыкъ булан оьктем бола. Дагъыстанлылардан 58 адам Совет Союзну Игити деген оьр атгъа ес болгъан. 7 адам Макътавлукъ орденни толу кавалерлери болгъан. Оланы макътавлу ишлерин узата туруп, дагъыстанлылар Россияны Игитлери де болгъан.
Биз эсли наслуну алдында борчлубуз. Гьар не янындан да оланы гёнгюн алып, олагъа исси янашыв гёрсетип билме тарыкъбыз.
Яш наслуну уллуланы ругьунда тарбиялап билмек де бизин борчубуз. Неге тюгюл, уллулар, бизин ветеранлар оьзлени къызгъанмайлы, Ватанны харлысызлыгъын сакълап бажаргъан.
Биз Уллу Уьстюнлюкню парадларыны ортакъчылары болгъан давну ветеранларыны варислик ёлун юрютеген яш наслуну парадын да ачма сюебиз. Шо ойну ветеранлар да, яшёрюмлер де якълай.
Уллу Ватан давну ортакъчыларын, бары да дагъыстанлыланы Уьстюнлюкню гюню булан къутлайман! Яхшы савлукъ, парахатлыкъ, аманлыкъ ёрайман.
Дагъыстан Республиканы Башчысы Рамазан Абдулатипов.
Абдул-Вагьап Сулейманов,
Дагъыстанны халкъ шаири
Къайдасыз, достларым, къайдасыз?
Беш йыл бир къазандан ашагъан,
Беш йыл бир окопда яшагъан,
Беш йылны гьар гюнюн-гечесин
Ажжалдан, оьлюмден башлагъан,
Достларым, не болуп къалдыгъыз!
Айтыгъыз, шо оьктем башланы
Сиз къайсы тёбеге салдыгъыз?
Сиз къайсы чёллерде къалдыгъыз?
Айтыгъыз, достларым, къайдасыз?
Къайдадыр сиз ятгъан къабурлар?
Билигиз, гетмеди пайдасыз
Ватангъа сиз этген абурлар,
Ону учун сиз гюйген гюювлер,
Оьзю учун жан берген сюювлер!
Сизин шо сюювлер, билемен,
Яшайгъан шу бизин яшларда,
Дагъы да оланы гёремен
Башларын кёклеге тийдирип
Халкъ салгъан эсделик ташларда–
Тюплерин ал гюллер безейген,
Алдында яш къызлар гезейген,
Кёп тюрлю атларда гёремен,
Белгисиз солдатгъа ягъылгъан
Даимлик отларда гёремен.
Уьйлер де
Ахшамгъы ярыгъын
Ойлайман олардан ала деп,
Юрекде игитлик гьислер де,
Къуванч да,
Кюлкюлю сеслер де,
Сююв де
Олардан бола деп.
