Ата-анасы Абдулхалит ва Къурайыш абурлу врачлар болгъаны кёплеге белгили. Шаирлени, язывчуланы ватаны Яхсай юртда тувуп оьсгени саялы, Айшат бек оьктем бола, сююне. Жагьил къыз Айшат Саликова 1988-нчи йыл Дагъыстан медицина институтну оьр къыйматлагъа тамамлап, врач касбугъа ес бола. Ботаюртлу улан Арсен Саликов булан агьлю къуруп, яшав ёлу башлана.
Айшат Саликова 1989-нчу йыл Ботаюрт участка больницада иш ёлун башлай. Арадан йыллар оьте туруп, сынав топлана, иш гьаракаты да арта.
Бажарывлугъун, касбусун оьр даражада юрютюп болагъанын эслеп, 1993-нчю йыл Айшат Саликованы медколлектив баш врач этип сайлай. Дурус да этген. Юртлуланы арасында абур-сый къазангъан, яшавда оьз ерин тапгъан адам. Рабият Арсланалиева булай сесленди:
– Айшат Саликова булан бирликде ишлейгенимни насипге ёрайман. Ол къайгъынга талчыгъып, сююнчюнгден сююнюп болагъан асил хасиятлы, сюйкюмлю, илиякълы, ишине гьакъ юрекден берилген адам. Яш касбучуланы насигьатчысы да дюр, иш, сёз булан да кёплени тюз ёлгъа салгъан, герекде рагьмулу къолун зайыплагъа узатгъан, жамият юрт ишлерде де актив кюйде ортакъчылыкъ эте.
Бу насипли татывлу агьлюде эки къыз, улан оьсген, адам сукъланардай тарбиялангъан. Исбайы къызлары Мадина ва Альбина врачлар болуп ишлейлер, Гьажимурат – медакадемияны 5-нчи курсуну студенти.
Айшат Саликованы лайыкълы загьматы пачалыкъны янындан эсленмей къалмагъан, ол 1-нчи даражалы врач, Дагъыстан Республиканы ат къазангъан врачы, Россияны савлукъ сакълавуну отличниги. Айшатны ёлбашчылыгъы булан Ботаюрт участка больницада кёп йыллар бою намуслу кюйде ишлейген Сувсар Муртазалиеваны, Асият Гьажиеваны, Гюлияр Абукованы, Гюлнара Абдуллаеваны, Зоя Османованы атларын эсгерме де тийишли. Ону оьзюне буса юрт агьлюлер «бизин Айшат» дейлер.
– Мен школагъа юрюйген вакътимден тутуп, «Ёлдашны» (алда «Ленин ёлу» эди) кёп сюеген, огъар абур-сый этеген охувчусуман. «Ёлдашны» бетлеринде чыгъагъан тарихге, савлукъгъа, адабиятгъа, юрт яшавгъа язылагъан макъалаланы оьтесиз ушатып охуйман. Милли газетибиз яшавну талчыгъын, сююнчюн суратлап, адамланы аркъатаяву болсун, – дей лакъырны ахырында Айшат Саликова.
Зайналабит Басханов.
Ботаюрт, Хасавюрт шагьар.
Суратда: Айшат Саликова.
